Үржарлық дәрігерлер үн қатпақ

Сондағы санаға сақ етіп келген ой – адам өміріне араша түсетін медицина саласы шекара шебінде жатқан ауданда қауқарсыз ба? Науқастарды салдырлатып, сонау 600 шақырым шалғайдағы Үржардан облыс орталығына немесе Семейге жеткізу қиынға соқпай ма? Күн райы қолайсыз болды дегеннің өзінде жолдың жай-күйі қалай?

Алдымен орын алған қайғылы оқи­ғаға тоқталайық. Ақпанның 3-і күні кеш­кі сағат 19:30 шамасында, тіркемесі бар «DAF» жүк көлігінің 29 жастағы жүр­гізу­шісі қолайсыз ауа райына бай­ланысты тізгінге ие бола алмай, қарсы келе жатқан жедел жәрдем автомо­билі­мен соқтығысқан. 44 жастағы жедел жәрдемнің жүргізушісі ауыр халде ауру­ханаға жеткізілсе, анестезиолог дәрігер Болат Әділханов пен жоғары санатты хирург Бейбіт Ғабдулин оқиға орнында қайтыс болды. Екеуінің де соңында шырылдап бала-шағасы қалды. Ауыр қазаға байланысты Денсаулық сақтау министрі Алексей Цой дәрігерлердің отбасыларына, туған-туыстарына қайғырып көңіл айтты.

«Денсаулық сақтау министрлігі ұжы­мының атынан және өз атымнан Шығыс Қазақстан облысында жол-көлік оқиғасында қаза тапқан жедел жәрдем қызметінің дәрігері мен фельд­шерінің отбасыларына қайғырып көңіл айтамын. Бұл трагедия дәрігер болудың қаншалықты қауіпті екенін көрсетті. Ауа райының қолайсыздығына, жұмыстың ауырлығына, шаршағанына қарамастан, дәрігерлер өз кәсібін қашанда адал атқа­рады. Қайғылы оқиға медицина қызмет­керлерінің қауіпсіздігі жайлы тағы бір ой­лануға түрткі болып отыр» деп жазды ведомство басшысы өзінің әлеуметтік парақшасында.

Аталған факті бойынша Қылмыстық кодекстің 345-бабы, 4-бөлігіне сәйкес сот­қа дейінгі тергеу амалдары басталды. Бірқатар сот сараптамалары да та­ғайын­далды. Белгілі болғандай, жедел ме­дициналық жәрдем көлігі «қан кетіп» жатқан әйелді Үржар ауданынан Семей қаласына жеткізіп, қайтып бара жатқан жолда апатқа ұшыраған. «Әт­теген-ай» деп ауданның ауруханасына хабарласқанымызда, науқасты аман алып қалу үшін әр минут маңызды болғанын айтты.

– Біз қалалық дәрігерлермен үнемі кеңесіп отырамыз. Осы жолы да консилиум болып, операциядан кейін ас­қазан-ішек жолдарынан қан кеткен нау­қасты Семейге апаратын болып шеш­тік. Өйткені диагнозы түсініксіз еді. Дәрі­герлеріміз науқас әйелді қалалық ауруханаға аман-есен жеткізіп, қайтар жолда қайғылы жағдайға ұшырады, – деді Үржар аудандық ауруханасы емдеу ісі бойынша дәрігердің орынбасары Әсел Қабдолова.

«Жазмыштан озмыш жоқ» деп басу айтады мұндайда. Иә, аудан басшылығы көз жұмған дәрігерлердің отбасыларына жан-жақты көмек көрсететілтінін де хабардар етті. Алайда бала-шаға­ла­рына асқар таудай әкелерін қайтара ал­май­ды. Өзекті өкініш өртемеуі үшін аудандардың медицина сапасын қала­лық жермен теңестіру керек. Демек, адам өмірін сақтап қалуға ең қажетті медициналық құрылғылар мен білікті мамандар ауданға да тартылу керек екені әркімге түсінікті. «Қайғылы оқиға ме­дицина қызметкерлерінің қауіпсіздігі жайлы тағы бір ойлануға түрткі болып отыр» деген А.Цой да соны меңзесе керек. Егер бүгін-ертең денсаулық сақтау саласына шынайы көңіл бөлінбейтіндей болса, шұрық-тесігінен аяқ сындыратын жолды мерзімінде аяқтау керек еді. Естеріңізде болса, Премьер-Министр Асқар Мамин Шығысқа келген сапарында, 415 шақырымға созылып жатқан Қалбатау – Майқапшағай тас жолындағы күрделі жөндеу жұмыстары 2020 жылы аяқ­талуы керектігін айтқан. Жылжып жыл өтті. Шұңқырлары қазандай жол әлі жа­тыр. Әрине, жол үстінде техника­лар жөндеу жұмыстарын жүргізіп жүр. Бі­рақ Премьер-Министр айтқан уақыттан кешікті.

Ал Үржар ауданы әкімінің орынбасары Біржан Қадірұлының айтуынша, ауданда медициналық құрылғылар, дәрігерлер толығымен жеткілікті. Биыл ком­пьютерлік томография қойылды, ауру­­ханалар 5 жедел жәрдем көлігімен қам­тылды, Мақаншыдағы тубдиспансер 30 адамға лайықталып, инфекциялық ауру­хана етіп қайта жабдықталды. Үржар мен Мақаншыға кислород беретін үлкен аппараттар орнатылып, трассалары тартылды.

Дей тұрғанмен, ауданның денсаулық сақтау саласында күрмеуі қиын мә­селелер көп сияқты. Өткенге оралсақ, 2018 жылы Шолпан ауылында қырықтан астам бала «А» гепатитіне шалдығып, 6-сынып оқушысы көз жұмған болатын. Сол уақытта дәрігерлер амбулаториялық қыз­метті ақылы көрсеткені де анық­талып, жұрттың жағасын ұстатқан. Қай­ғылы оқиғаның соңы – бас дәрігердің жұ­мыстан босатылуымен аяқталды. Қош делік. Үржар аудандық орталық ауру­ханасының ұжымы қазіргі басшы Баубек Әбілқасымовпен де жұмыс істесе алмай­тынын айтып жүр. Естеріңізде болса, оннан астам ақ халаттылар бас дәрі­гердің жұмыстан босатылуын сұрап, әлеу­меттік желі арқылы бейнеүндеу та­рат­қан. Олардың ішінде кешегі апатта көз жұмған Бейбіт Ғабдулин де бар еді.

Ашық ақпарат көздеріне сүйенсек, бас дәрігер қол астындағы қызметкерлердің есепшотына ақша аударып, әлдебір комиссияны күтуге жұмсаған көрінеді. Ауыл­дардағы учаскелік дәрігерлердің мәселесі шаш етектен сияқты. Білімді жас мамандардың жұмыс істеуіне де кесе-көлденең тұрып, кедергі келтіреді екен. Сөзіміз дәлелді болсын деп, аудан­дық аурухана дәрігерлерімен сөйлесіп те көрдік. Олар жоғарыда аталған мәселенің барын жоққа шығармады. Бірақ ақылдасып барып үн қатайық десті. Сөз соңында, көтерілген мәселені аяқсыз қалдырмай, Үкіметке жетсе екен деген тілектерін айтты. Ендеше, бұл тақырыпқа қайта оралатын боламыз.

Шығыс Қазақстан облысы,

Үржар ауданы