Астанада Адам құқықтары жөніндегі уәкіл Асқар Шәкіров пен Қазақстандағы БҰҰ Балалар қорының (ЮНИСЕФ) өкілі Джун Кукита Қазақстандағы балалардың құқықтарын қорғау мен мадақтау саласындағы Өзара түсіністік туралы меморандумға қол қойды, деп хабарлады Қазақстан Республикасындағы Адам құқықтары жөніндегі уәкіл аппаратының баспасөз қызметі.
Тараптар қол қою шеңберінде Адам құқықтары жөніндегі уәкіл мен ЮНИСЕФ арасында соңғы жылдарда қалыптасқан өнімді ынтымақтастықты қорытындылады. Осылайша, халықаралық сарапшыларды тартумен бірге, жүйелі негізде интернаттық мекемелер мен жалпы білім беру мектептерінде балаларға қатысты зорлық-зомбылық мәселелеріне зерттеулер жүргізілді, балалар мекемелеріне мониторинг жүргізуге арналған құрал әзірленді, тренинг және семинарлар өткізілді.
2014-2015 жылдарға арналған меморандум адам құқықтары жөніндегі халықаралық шарттарды, атап айтқанда, БҰҰ Бала құқықтары туралы конвенциясын, Азаптауға және басқа да қатыгез, адамгершілікке жатпайтын немесе ар-намысты қорлайтын іс-әрекеттер мен жазалау түрлеріне қарсы конвенциясын, Қазақстан Республикасының «Баланың құқықтары туралы» Заңын және ел Президентінің «Қазақстан жолы – 2050: бір мақсат, бір мүдде, бір болашақ» атты Қазақстан халқына Жолдауын іске асыру мақсатында жасалды.
Қол қойылған құжат шеңберінде тараптар балаға мейірімді болатын әділет жүйесін жетілдіру, құқық қорғау тетіктеріне балалардың және жастардың осал топтарының қолжетімділігін жақсарту, балалар мекемелеріне тәуелсіз мониторинг жүргізу, сондай-ақ, балаларға қатысты зорлық-зомбылықтың алдын алу мақсатында ақпараттық науқандарды өткізу сияқты балалар құқықтарын қорғау саласындағы ықтымақтастықты жалғастырады.