Президент Жолдауы қоғамды алаңдатқан талай тақырыпты тап басып көрсетті. Ең бастысы, мемлекеттік аппараттың, атқарушы биліктің жұмысы халыққа барынша жақын, түсінікті болуы қажет деген талап анық байқалып тұр.
Шынында да халық даурықпа сөзден шаршады, әр адам жеке басы күн сайын жақсы өзгерісті сезінбейтін болса, болашаққа сенімі де болмайды. Мен әрбір ауылдық округтің өз қаражаты болатыны, аудандық және қалалық мәслихат депутаттарын халықтың партиялық тізім бойынша емес, тікелей сайлайтыны жөніндегі ақпаратты естіп қуандым. Шынында да қазір депутаттарды халық танымай да қалды. Өйткені депутат партия бекіткен линиядан шыға алмай, өзінің жеке пікірін айта алмайтын дәрежеге жетті ғой. Енді осы айтылған өзгерістерді тезірек жүзеге асыру қажет. Тез арада, мүмкін жарты жыл ішінде еліміздің сайлау туралы заңдарына тиісті өзгерістер енгізілсе, жаңа сайлаулар өте бастайды. Кәсіби сайлау комиссиялары құрылатыны, байқаушылардың мәртебесі заңмен бекітіліп, қорғалатыны сайлау сапасын арттыра түсетіні анық. Мысалы қазір облыстық сайлау комиссиясының штатында екі-ақ адам бар. Бұл әрине, жеткіліксіз екені түсінікті ғой. Айта кетейін, бізде тұрақты сайлау өткізумен айналысатын кәсіби комиссия кеңес кезінде де болған емес.
Тағы бір мәселе – әр өңірдің өзіне тән ерекшелігі, қалыптасқан әлеуметтік-экономикалық әлеуеті сараланып, нақты іске кірісу керек. Батыс Қазақстан облысының алдында тұрған ең үлкен мәселе – ауыл халқының тұрмысын жақсарту дер едім. Біздің ауылдардың толық әлеуеті әлі ашылмай жатыр. Президент өз Жолдауында азық-түлік мәселесінің өте маңызды екенін айтты. Ал бұл мәселе ауылды түлетумен ғана шешіледі. Ауыл халқының тұрмысы жақсарса, олар қалаға көшпес еді, қаланың инфрақұрылымына артық салмақ түспес еді. Әр азаматтың адал кәсіп етуіне, ауылда қалуына жағдай жасау керек. Елді азық-түлікпен қамтамасыз ету стратегиялық міндеті ауыл арқылы ғана жасалады. Біздің халықтың тамыры ауылда. Бірақ бізде, соның ішінде Батыс Қазақстан облысында ауыл шаруашылығы қазір өз деңгейінде емес. Халық малын өсіреді, бірақ қалай сатарын білмейді. Жүн мен тері өңделмейді. Құс бағылмайды. Осы мал шаруашылығы өнімдерінің бәрі ауылда өңделіп, дүкен сөресіне дайын өнім қалпында түсетіндей етіп жасауымыз керек. Ауылда егін технологиясы да дұрыс қолданылмайды. Диқандарымыздың көбі көкке қарап, тек жаңбырға сеніп отырады. Ал шетелде табиғи жағдайы бізден де қиын жерлерде мол өнім алудың алгоритмдері әбден қалыптасқан. Сол үрдісті алып келу керек. Үнем мен жоғары технологияны ауылға кеңінен енгізсек, ауылдың екінші тынысы ашылары сөзсіз. Мен бұл сөзді көп жыл аудан әкімі болып, шаруашылық басқарған тәжірибиемнен айтып отырмын.
Ғайса ҚАПАҚОВ,
Батыс Қазақстан облыстық сайлау комиссиясының төрағасы