Мемлекет басшысы Қасым-Жомарт Тоқаев VIII сайланған Парламент Мәжілісінің бірінші сессиясының ашылуында мұғалімдер даярлау ісін арттыру үшін пәрменді іс-шаралар қабылдап, білім беру жүйесіндегі менеджментті жақсартуға басымдық беруді тапсырды. Оқу-ағарту министрлігі мен Ғылым және жоғары білім министрлігі осы бағытта кешенді жұмыс бастады.
Облыстық білім басқармалары басшыларының, педагогикалық жоғары оқу орындары ректорларының және ведомстволық бағынысты ұйымдардың басшыларының қатысуымен екі министрліктің бірлескен кеңесі өтті. Іс-шараға қатысқан жүзден астам маман педагог кадрларды сапалы даярлаудың өзекті мәселелерін, негізгі басымдықтар мен оларды шешу жолдарын талқылады. Сондай-ақ бірлескен ынтымақтастық, жас мұғалімдерді даярлау және олардың құзыреттілігін арттыру мәселелері көтерілді.
Оқу-ағарту министрінің міндетін атқарушы Ғани Бейсембаевтың айтуынша, кадр сапасы мен педагог мәртебесін арттыру бойынша кешенді жұмыстар жалғасып жатыр. Кейінгі төрт жылда мұғалімдер жалақысының екі есе өсуі – соның дәлелі.
– Министрліктің басым міндеттерінің бірі – білім беру ұйымдарын жоғары білікті кадрлармен қамтамасыз ету және білім беру жүйесіндегі менеджментті жақсарту. Мықты басшыларды іріктеу және даярлау бағдарламасы әзірленіп жатыр. Толыққанды зерттей отырып, жоғары білікті педагогтер базасын және мектеп директорларының кадрлық резервін құру жөніндегі қағидаларды әзірлеу қажет. Мемлекет басшысының тапсырмаларын орындау мақсатында қазір педагогикалық жоғары оқу орындарының Ы.Алтынсарин атындағы Ұлттық білім академиясымен және білім басқармаларымен өзара іс-қимылын күшейту өте маңызды, – дейді Ғани Бейсембаев.
Кеңесте Ғылым және жоғары білім министрінің міндетін атқарушы Саясат Нұрбек сөз алып, педагогикалық білім беруді дамыту бойынша атқарылып жатқан іс-шаралар туралы айтты.
– Мемлекет басшысы білім беру саласына өзгерістер енгізетін 1 мың көшбасшы даярлауды тапсырды. Осы тапсырманы орындау үшін министрлік жаңа формациядағы мектептердің топ-менеджерлерін даярлауды жоспарлап отыр. Ол үшін еліміздегі үздік жоғары оқу орындарының базасында жетекші мектептерді тарта отырып, магистратураның арнайы бағдарламалары іске асырылады. Педагогикалық білім беруді аккредиттеу «Педагог» кәсіби стандартына негізделеді. «Педагог құзыреттілігінің шеңберін» қабылдау мақсатында министрлік «Жоғары оқу орындарының оқытушысы» кәсіби стандартының жобасын әзірледі. Бұл стандарт жоғары оқу орындарының академиялық еркіндігін ескере отырып негіздемелік сипатта жүзеге асады. Сондай-ақ «Жайлы мектеп» жобасы аясында мұғалімдерді даярлау мақсатында жыл сайын педагогикалық бағыттарға 7 мың грант бөлу жоспарланып отыр. Оқу-ағарту министрлігімен бірлесіп, педагогтерге арналған біліктілік тесті әзірленеді, – деді Саясат Нұрбек.
Басқосу қорытындысы бойынша заманауи сапалы педагогтерді даярлау мәселелері жөнінде ведомствоаралық кеңес құру туралы шешім қабылданды. Кеңес кадрлардың сапасын арттыру және білім беру ұйымдарын жоғары білікті мамандармен қамтамасыз ету жөніндегі жұмысты жалғастырады.