Кірістің көзі – туризмде. Мұны жақсы білетін елдер туризмге қомақты қаржы бөлсе, туристік компаниялар арасында бәсекелестік қызып тұр. Ал туристер көбіне-көп бұрын-соңды көрмеген, таңсық дүниелерге қызығады. Мысалы, қазір музейдегі экспонаттарды тамашалауға таптырмайтын виртуалды мұражай веб-сайттары бар. Бұл да болса, өлкенің мәдени-тарихи мұраларын қашықтан тамашалауға мүмкіндік береді.
Мұндай музейдің артықшылығы – экспонаттарды әр қырынан жақындатып немесе алыстатып көруге мүмкіндік береді. Виртуалды музей тарихи ескерткіштердің ұзағырақ сақталуына септігін тигізеді әрі қонақтарға тиімді. Неге десек, кез келген азамат виртуалды мұражайдан экспонаттарды тез әрі анық көре алады. Осыған қарап-ақ виртуалды мұражай ерекше қабілетті жандарға қолайлы екенін білуге болады.
Жуырда Мәдениет және спорт министрлігі мен Орталық мемлекеттік музей мамандары ұйымдастырған «Ұлы даланың ұлттық дәстүрлері» халықаралық ғылыми форумында Kazakh Tourism ұлттық компаниясы Мета-виртуалды музей жобасының идеясын ұсынды. Жобаны IT және CGI цифрлық анимация технологиясы саласында жұмыс істейтін «Sifro» компаниясымен бірлесіп іске асырып жатыр. Бірегей музейдің жобасы «Қазақстанның материалдық емес мәдени мұрасы: жаңа әдістер мен қағидаттар» секциясында ұсынылды. Секция барысында Kazakh Tourism креативті индустриялар департаментінің жоба жетекшісі Әсел Серікбаева виртуалды музейдің мүмкіндігі жайында айтып берген еді.
– Мета-виртуалды музейі – бұл виртуалды шындық, интерактивті технологиялар және әлемнің кез келген жерінде қолжетімді мұражай кешенін құруға арналған құрал. Кәдімгі музейлердің орналасқан аумағына және экспонаттардың санына қарай шектеулер болса, мета-виртуалды музейдің мүмкіндігі мол. Онда барлық экспонаттың сандық көшірмелері, сондай-ақ виртуалды көрмелер мен экспозициялар болуы мүмкін», – дейді Ә.Серікбаева.
Осы форумға ғылыми ұйымдардың қызметкерлері, мұғалімдер, шығармашылыққа ден қойған зиялы қауым, музей, архив, кітапхана мамандары, жас ғалым, түркі әлемінің тарихы мен мәдениетін зерттейтін студенттер, магистранттар мен докторанттар және басқа да мүдделі тұлғалар қатысқан. Форум соңында Мәдениет және спорт министрлігі креативті индустрияларды дамытуға жауапты уәкілетті орган болып белгіленсе, Kazakh Tourism-де креативті туризм департаменті ашылғанын білдік. Демек, елде креативті секторды дамытуға, креативті кәсіпкерлердің өнімдерін экспортқа шығаруға басымдық беріледі.