Осыдан оншақты жыл бұрын басталған үрдіс биыл да жалғасын тапты. Жуырда еліміз бойынша өткізілген «Ағаш егу» күнінен ұлытаулықтар да шет қалмады. Тіпті, аса белсенділікпен атсалысты деуге болады.
Облыс бойынша биыл 28 495 түп ағаш егу жоспарланған еді, ал, нақты нәтиже 135 мыңға жуықтады. Тек «Орман және жануарлар әлемін қорғау жөніндегі Жаңаарқа шаруашылығы» КММ 4 гектар жерге 133320 ағаш егіп тастады. Қалалар мен аудандарда да саябақтар мен көшелердің бойына егілген жас ағаштар жаңа көктемнің лебін сездіріп тұр.
– Бізде ағаш егуде мін болмайды. Бірақ, содан кейінгі баптауы, күтіміне келгенде күмілжіп қалатынымыз бар. Айталық, өткен жылы қаладағы қоғам белсенділері өзіміз демеуші тауып, көшеттер сатып алып, қаладағы саябақтарға еккен болатынбыз. Суғарумен айныласатын мердігерлер анықталғанша, сол еккен ағаштарды өзіміз суғарып жүрдік. Мердігер анықталғасын, соларға табыстадық. Ақыры не болды? Әлгі мердігердің міндетін шала атқаруы салдарынан егілген ағаштың жартысы қурап қалды. Сондықтан ағашты егуден бұрын оның күтіміне қатаң бақылау жасамай болмайды, – дейді жезқазғандық қоғам белсендісі Мархат Хамит.
Егілетін ағаш та аспаннан түсе қалмайды, негізінен бюджет қаржысына сатып алынады. Ендеше, әрбір тамыранланбаған немесе қурап қалған ағаш та халық қаржысын желге ұшыру болып саналады.
Ұлытау облысы