Құрылысшылар қолтаңбасы

Мәселен, Атырау облысында 2000 жылдан бері құрылыс индус­триясы қарқын алып отыр. Мұ­найлы шаһарда бірнеше ша­ғын ауданда тұрғын үй бой түзеді. Тек облыс орталығы ғана емес, аудандар мен шалғайдағы ауылдарда да мектептер, мәде­ниет үйлері мен медицина нысандары көптеп пайдалануға беріліп келеді.

Атырау облысы әкімінің орын­басары Жасұлан Бисем­биев­тің айтуынша, 2025 жылға дейін 35 денсаулық сақтау нысанын салу жоспары бар. Оның ішінде осы жылдың соңына дейін 10 медициналық нысанды пай­далануға беру көзделіп отыр.

«Құрманғазы ауданындағы Алтыншы, Шағырлы, Жасталап, Егінқұдық ауылдарында меди­ци­налық нысанды салуға да­йын­дық басталды. Қазір арнайы бөлінген учаскелерде топырақ төгу жұмыстары жүріп жатыр. Ал Махамбет ауданының Тал­ды­көл ауылындағы тозығы жеткен дәрігерлік амбулатория ғи­­маратын бұзу қолға алынды. Орнына заманауи ғимарат са­лы­­нады. Тұрғындар Исатай ауда­нын­ың орталығы Аққыстау ауы­лында фельдшерлік-аку­шер­лік пункт, Жылыой ауданында ор­та­лық аурухана, Атырау қа­ла­­­сының маңындағы Береке, Дамбы ауылдарында дәрігерлік амбу­латорияның игілігін көре бастайды», дейді Ж.Бисембиев.

Әкім орынбасарының дере­гі­не сүйенсек, келесі жылы дәл осындай 25 нысанның құры­лысы аяқталады. Жаңа нысан­дар­ арасында 7 медициналық пункт, 6 дәрігерлік амбулатория, 5 фельдшерлік-акушерлік пункт бар. Атырау қаласында үш қо­са­л­қы пункті бар жедел меди­ци­­налық жәрдем стансасы үшін жаңа ғи­марат бой көтереді.

Сонымен қатар биыл 7 мектеп пен 1 жапсаржайдың құрылысын аяқтау жоспарланған. Сөйтіп, жалпы саны 6 450 орынға шақталған жаңа мектептер оқушыларды қа­былдайды. Қолданысқа бері­ле­тін жаңа мектептердің бесеуі Атырау қаласының аумағында орналасқан. Нақтылай айтқан­да, Нұрсая, Сарыарқа шағын аудандарындағы Binom мектеп­те­рі, Мағжан Жұмабаев атын­да­ғы мектептің жаңа ғима­ра­ты, Жаңаталап және Ақжар ауылында, Махамбет ауданында құ­рылысы аяқталатын білім ордасы, Исатай ауданының Тұщы­құ­дық ауылындағы мектептің жапсаржайы пайдалануға тапсырылады. Ал келесі жылы 18 мектепті пайдалануға беру жос­парланып отыр. Оның ішінде 9 білім ордасы «Жайлы мектеп» бағ­дарламасымен салынады.

Міне, осындай әлеуметтік ма­ңызы зор нысандардың бәрінде құрылысшылардың маңдай тері, құрыш қолының қолтаңбасы, бір сөзбен айтқанда, қажырлы еңбегі бары даусыз. Бір қарағанда ақ қағазға жобасы сызылған түрлі ғимараттың іргетасын құйып, тасын қалау, сылап-сырлау оңай көрінуі мүмкін. Бірақ өз ісіне жауапкершілікпен қарайтын құ­ры­лысшылар үшін олай емес. Әр істің өз қиындығы болатыны секілді, ғимаратты тұрғызуда жобадан ауытқымау қажет. Сол себептен тас қалаушылар да, сы­лақшылар да әр күнгі ісі­нің нәтижесіне екі шұқып, бір қа­рай­ды.

Мәселен, «Тараз­Құ­рылыс­Ин­вест» ЖШС бас директоры Нұрбола Әбдірасыловтың айтуын­ша, был­тырдан бері Аты­­рау қа­ласының «Бірлік-2» шағын ауданын­дағы 600 орын­дық мек­теп­тің құрылысы салынып жатыр. Білім ордасының нысанын 2024 жылғы қыркүйекке дейін пайда­лануға тапсыру жос­пар­ланып отыр. Аталған серік­тес­тік құрылысшылары бұған қоса Тасқала, Еркінқала елді ме­кен­­дерінде де мектептердің құ­ры­лысын жүргізуді қолға алған.

Ал «Батыс­Строй­Сер­вис­Атырау» ЖШС-ның 150-ге жуық құры­лыс­шысы 8 нысан­ның құрылысын сапалы жүр­гі­зуді мақсат етіп отыр. Се­рік­­тестіктің учаске шебері Еркебұлан Есеновтің айтуына қа­ра­­­ғанда, салынып жатқан нысандар әлеуметтік сала үшін аса қажет. Өйткені тұрғындар бал­тыры сыздап, басы ауырса, ауру­хана дәрігерлеріне жүгінеді. Рухани азық алу үшін мәдениет үйлеріне барады. Ал спорт ке­шен­дері саламатты өмір салтын ұстанып, бұқаралық спортқа ден қойғандардың ұдайы бас қосатын нысанына айналады.

«Біздің құрылысшылар бригадалары әр нысанның сапалы салынуына баса мән береді. Ұжымда құрылыс саласында толымды тәжірибесі қалыптасқан мамандар жинақталған. Тас қа­лау­­шылар, сылақшылар жұмы­сын жауапкершілікпен атқара­ды», деді Е.Есенов.

Атырауда құрылыс индус­трия­­сына мол үлес қосып жүр­ген құрылысшылардың кәсі­би мерекесі қарсаңында тас қа­лау­шылар мен сылақ­шы­лар­дың сайысы өтті. Оған құ­ры­лыс компанияларынан 7 команда қатысып, шеберлігін ортаға салды. Құрылысшылар бәсекесіне облыстық мемлекеттік сәулет-құрылыс бақылау бас­қар­масы­ның бөлім басшысы Рүстем Маха­баев, сарапшы Талғат Бисе­нов пен техникалық қада­ға­лаушы Қанат Ермұханов қазы­лық етті.

«Ел аумағындағы бой кө­тер­ген әр тұрғын үйде, әр ғимаратта, әлеуметтік нысанда құрыш қол­ды құрылысшылардың қол­таң­басы бар. Құрылыс индус­триясын дамытуға үлес қосып жүрген құрылысшыларға да, салаға жауапты мамандарға да үлкен жауапкершілік жүктеліп отыр. Өйткені бәріміз түрлі мақ­саттағы ғимараттар мен тұр­ғын үйлер құрылысын салып қана қоймай, онда жұмыс істейтін, тұратын адамдардың өмірі үшін жауап береміз. Сол себептен құрылысшылардың тәжірибесін шыңдау, бір-бірімен тәжірибе алмасуына сайыстың ықпалы зор болады», деді облыс әкімінің орынбасары Қайрат Нұртаев.

Облыстық құрылыс басқар­масының басшысы Нұрберген Құсайыновтың айтуынша, мұн­дай сайыс осымен екінші рет өткізіліп отыр. Алғаш рет 2019 жылы өткізілген. Бұл сайыс құ­ры­лысшылардың біліктілігін арттыруға ықпал етеді.

«Бұл сайысқа қатысу­шы­лар­дың жұмысын бағалауға құ­рылыс саласындағы білікті ма­­мандар шақырылды. Олар сайыскерлердің еңбек қауіп­сіз­дігін сақтау деңгейіне, кірпішті қалау тәсіліне, тік және көл­денең тігісті сақтауына, сыртқы және ішкі верстің түзу­лігіне, сылақты тегіс жүр­гізуге, жалпы жұмыстың сапасына бағасын берді», дейді Н.Құсайынов.

Құрылысшылар сайысына қазылық еткен мамандар ше­ші­мімен жеңімпаздар мен жүлдегерлер анықталды. Сылақ­шылар арасынан бірінші жүлдені «Сұңқар құрылыс» ЖШС бригадасы еншіледі. Ал «ARSM» мен «БатысАльянсСтрой» ЖШС сы­лақ­шылары екінші және үшін­ші жүлдені жеңіп алды.

Тас қалаушылар шеберлігін бір-бірінен асыруға тырысты. Сайыстың бірінші жүлдесі «TSG Construction» ЖШС командасына берілді. «БатысСтройСервис» бен «ТаразҚұрылысИнвест» ЖШС тас қалаушылары екінші және үшінші жүлдені өзара бөлісті.

Сондай-ақ шағын футболдан турнирге құрылысшылардан құралған 15 команда қатысты. Турнирде бірінші орынды облыс­тық жолаушылар көлігі, автомобиль жолдары және энергетика басқармасының ко­мандасы, екінші орынды «Сала», үшінші орынды «BI Group» ЖШС командасы иеленді. Жасыл алаңда жоғары шеберлік көрсеткен бір­не­ше ойыншы аталымдар бо­йын­ша жүлделерге ие болды. Арслан Құтфуллин – «Үздік ойын­шы», Әл-Фараби Қойбағаров – «Үздік шабуылшы», Жанбота Нығметов – «Үздік сұрмерген», Айдарбек Зиноллаев – «Үздік қақ­пашы», Тұрлан Айтбаев «Үздік қорғаушы» атанды.

Атырау облысы