Ақтөбелік велосаяхатшы Арқаға жетті

Ақсақал өзінің жасы туралы: «Мен – 69-дан енді астым» деп әзілдейді. Ар­дагер велошабандоз еліміздің біршама бөлігін велосипедпен жүріп өтіпті. Құдай қуат бер­се, небәрі екі айдың ішінде бү­кіл ел аумағын аралаймын деп отыр.

– Мен шамамен осы жолы 6 мың шақырымды басып өттім. Орал, Ақтөбе, Жезқазған, Қы­зыл­орда, Түркістан, Тараз, Өске­мен, Семей қалаларында болдым. Енді Қарағандыдан кейін Ас­тана, Көкшетау, Петропавл, Қос­танай, Ақтөбе қалаларына ба­рып, сапарды Атыраумен аяқ­тай­мын деп ойлап отырмын. Күніне қанша шақырым жүріп өтетінімді дәл айту қиын. Менің межем – жергілікті теміржол стансалары. Бір теміржол стансасынан екіншісіне жалғайтын жолды қадағалаймын, – дейді Ж.Отарғалиев.

Бұл жолғы сапарын велошабандоз Бейбарыс сұлтанның – 800, Астана қаласының – 25 жылдығына арнапты.

– 2017 жылы алғаш рет велосипедпен Шалқардан Ақтөбеге дейін бардым. Бұл, шамамен, 350 шақырым. Ол аралықты мен 4-5 күнде жүріп өттім. 2018 жылы Ақтөбеден шығып, Атырауға бар­дым. Көліктерді ұнатпаймын. Қайда барсам да, менің негізгі тұлпарым, айнымас серігім – велосипед. Мен оған энергиядан өзге ештеңе жұмсамаймын. Моторлы көлік сатып алсаң, оның машақаты көп, майын ауыстыру керек дегендей. Шығыны да аз емес. Енді алдағы сапарым – Жамбыл даласы. Ондағы миссиямды Шу – Мойынтының қосылғанына 70 жыл толуына арнағым келеді, – дейді қария. Сөйтіп, ендігі бағытын Тараз – Түркісіб, Шу – Сарышаған, Мойынты бағыты бойынша өзгертетінін айтты.

Жұмабай ақсақал Ақтөбедегі «Velo pulse» велокомандасына қо­сылып, олармен бірге қала бойын­ша түрлі шараларға қатысып, сая­хат та жасайды. Арқаға ат басын тіреген ақсақалды облыстық дене шынықтыру және спорт басқармасы құрметпен күтіп алып, сәт сапар тілеп шығарып салды.

Қарағанды облысы