Талдықорғандағы Зияткерлік мектептің командасы роботтехникадан ұйымдастырылған олимпиаданың жеңімпазы атанды. Алматы қаласында өткен бәсекеде жетісулық өрендер ерекше көзге түсті. Роботтехникадан республикалық олимпиада Біріккен Ұлттар ұйымының тұрақты даму мақсаттарын орындауға бағытталған. Іс-шара логистика мен цифрлық инфрақұрылымға көмектесетін роботтарды жасау үшін қатысушыларды бір алаңға жинайды.
Байқаудың басты міндеті – күнделікті өмірде адамға қамқорлық танытып, қызмет көрсететін роботтарды әзірлеу.
Информатика пәнінің мұғалімі Николай Авдюниннің жетекшілігімен талдықорғандық команда екі жобаны ұсынды. Екеуі де «Future Innovators» аталымы бойынша (үлкен және орта топ) бірінші орынды жеңіп алды. 9-сынып оқушылары Диана Хасимова мен Илья Стасюков контейнерлерді сұрыптауға және қайта тиеуге арналған теңіз логистикалық терминалының прототипін жасады.
– Сауда-саттықтың 80 пайызы мұхиттар арқылы жүзеге асады. Сауданың дамуын шектейтін дүниелер де бар. Соның бірі – жөнелту портына келетін контейнерлерді ұзақ күту. Терминалды теңіз сауда жолдарының қиылысына орнататын болсақ, контейнерлерді жеткізу жылдамдығы артады. Теңіз терминалында жасанды интеллект жүйесі орналасқан. Нейрондық желі контейнерлердің таңбаларын анықтап, автоматтандырылған кранның көмегімен жүктерді жүктей де, түсіре де алады, дейді Диана.
9-сынып оқушылары Ранона Жәлелқызы мен Карима Мақанның бірегей жобасының атауы – «Өрмекші ана». Spider Mom – адам қолы жетпейтін жерлерге сымдарды өз бетінше төсеуге қабілетті робот.
– Интернетке қолжетімділік – еліміздің цифрлық дамуындағы стратегиялық маңызды мәселе. Бұл әсіресе пандемия кезінде, әлем онлайн режімге көшкен кезде анық байқалды. Дегенмен ауылдық елді мекендердің барлығы интернетке қол жеткізе алмайды. Біздің зерттеуіміз бойынша, елімізде 1 432 ауылдың 200 мыңнан аса тұрғыны интернет инфрақұрылымынсыз отыр. Цифрлық теңсіздікті жойып, азаматтарды сапалы байланыспен қамтамасыз ету маңызды, – дейді жас өнертапқыштар.
Жоба авторларының айтуынша, робот жоғары жылдамдықты оптикалық кабельді бекітуге, тіректердің түрлерін, тіпті ауа-райын анықтауға қабілетті.
Олимпиада «RoboMission», «Future Innovators», «Future Engineers» санаттары бойынша өткізілді. Әр санатта жоғары ұпай жинаған жеңімпаз командалар алдағы 7-9 қарашада Панамада өтетін халықаралық чемпионатта ел намысын қорғайды.
Жетісу облысы