Қарағандыда дауылпаз ақын Қасым Аманжолов атындағы «Дүниеге келер әлі талай Қасым» атты республикалық дәстүрлі мүшәйра өтті. Мүшәйра шарты бойынша өлеңдер 20-35 жас аралығындағы ақындар арасынан іріктеліпті.
Әр автор Қасымға арнау және еркін тақырыпта жазылған екі өлең, барлығы үш туындыдан ұсынған. Қазылар алқасы өлеңнің идеялық мазмұнына, көркемдік сапасына, авторлардың сөз саптау мәнері мен стильдік ерекшелігіне назар аударды.
Дәстүрлі мүшәйраның бас жүлдесі Баянауылдан қатысқан жас ақын Жоламан Әйткенге бұйырды.
– Студенттік шағым Қарағандыда өтті. Е.Бөкетов атындағы Қарағанды университетінің түлегімін. Мұнда көптеген әдебиетші ғалымдардың тәлім-тәрбиесін алдық. Қарағандының әдеби ортасы да көп дүние үйретті. Жалпы, Қасым жырларынан алар тағылым көп, – дейді Жоламан Әйткен.
Өлең додасында қарағандылық шайыр Ерік Нарын I орынға ие болса, ІІ орын астаналық Айдын Байыс пен Сәтбаев қаласынан қатысқан Мақпал Сабырға бұйырды.
Ал үздік үштікке қостанайлық Бақытжан Әлкебаев пен Балғын Апбасхан ілікті. Ынталандыру сыйлығын Шет ауданы, Ақой ауылынан келген Абай Кәлім, қарағандылық Кәмшат Хасен және сәтбаевтық Мәди Олжабай иеленді.
Жүлдегер ақындар ортаға шығып, өлеңдерін оқыды. Жас ақындардың жалынды жырлары көрерменге рух сыйлады.
Қарағанды облысы