Рудныйдың «Аят» футзал клубы Хорватияның Омиш қаласында өтіп жатқан футзалдан Чемпиондар лигасының негізгі кезеңіндегі алғашқы ойынында жеңіліп қалды.
Жерлестеріміз бірінші топта Португалияның «Спортинг», Хорватияның «Олмиссум» және Украинаның «Хит» командаларымен сынға түсіп жатыр. Топтық сайыстың алғашқы турында Рудный командасы жергілікті «Олмиссум» клубымен кездесіп, аса тартысты өткен кездесуде қарсыластарына 3:2 есебімен жол берді.
Бірінші кезеңде алаң иелерінен Джереми Буковца мергендік танытып, командасын есепте алға шығарса, екінші кезеңді жерлестеріміз белсенді бастап, 25-минутта таразы басын теңестірді. Гол авторы – Луан Марсело. Өкінішке қарай, арада екі минут өткенде хорватиялық клубтың ойыншысы Антонио Секулич 47 секунд ішінде «Аят» қақпасына екі гол соғып, «Олмиссумді» есепте қайта алға шығарды – 3:1. 36-минутта «Аят» сапынан Лукас Ян есеп айырмасын қысқартқанымен, жерлестерімізге таразы басын теңестіруге уақыт жетпей қалды. «Аят» екінші турда «Спортингпен» кездессе, 28 қазанда «Хит» клубымен ойнайды. Топта алғашқы үш орынды иеленген командалар элиталы кезеңге жолдама алады.