Өнерлі сержант

Жұмабек бүгінгі қызметіне қол жеткізу үшін ол қызметтің түрлі сатысынан өтті. Сержант Жұмабек Рахымов – Солтүстік Қазақстан облы­сы­ның тумасы. Бала кезден ұлттық өне­ріміз айтысқа қызығушылық танытып өсті.

– Әлі есімде, бала күнімізде теле­дидардан айтыс көретін едік. Отбасымызбен көк жәшікке қада­ла­мыз. Әкеміз екеуміз отырып, тал­қылаймыз, сөйлесеміз. «Қап, мына ақын мына жерде былай деуі керек еді. Мына ұйқасы былай­ болғанда» деген қызу әңгіме. Анам – Алматы облысының тумасы. Нағашыларымның көбі өнерге жа­қын. Домбыра тарту, ақындық бой­ла­рында бар. Әкемнің өзі баян, домбыра ойнады. Ауылдың бірде-бір тойы ата-анамның әнінсіз өтпейтін. Мен де бала кезімнен тойға шығып, ән орындаймын. Өзімнің өлеңдерімді айтамын. Қысқасы сол кезден-ақ ақындық жолды таңдауға бел будым, – деп әңгімесін бастады ұландық сарбаз.

Ақын болам деп арман­да­ған ке­йіп­­­керіміз мектепте қазақ тілі мен әде­­биетін, Қазақстан тарихы пә­нін­ терең­дете оқиды. Өңірден шық­­қан­ жырау, ақындардың шы­ғар­­­­ма­шы­­­лы­ғымен жақынырақ таны­­сады. Бе­ріл­ген білімді бойына­ барынша сі­ңі­реді. Нәтижесінде, Петро­павл қала­­сындағы дарынды бала­ларға ар­нал­ған оқу гимназиясына шақы­ры­лып, ойда­­ғыдай аяқтайды. Мек­теп­те бала ақын атанып, еліміздің бүкіл өңіріне жарысқа бар­ған.

– Әрине, өмір тақтайдай тегіс емес. Барлығы сен айтқандай бірден бола бермейді екен. Алғашында ­ауданаралық, облыстық айтыстарға шықтым. «Жеңіліссіз жеңістің дәмін білмейсің» демекші, сүрінген кездер де болды. Ағаттықтарымнан сабақ алып, келесі айтыстарға дайындалатынмын. Әсіресе маған ауылы аралас, қойы қоралас Көкшетау облысының тумасы Баянғали аға Әлімжанов көп ықпал етті. Оны телидидардан көріп, кейін әңгімелесіп, араласа жүріп ағалы-інілі қарым-қатынасқа көштік. Көп іздене жүріп, облыстың намысын қорғайтын айтыскерлердің қата­рын толықтырдым. Бұрын Петро­павл қаласындағы айтысқа қаты­са­тынмын. Сол кезде Ұлттық ұлан Әскери институтының атынан Медет Жексенай қатысып жүрді. Ол досым бір топ командасын ертіп, көрерменді курсанттармен толтырып, өз аудиториясымен келетін. Сонда да мені ұта алмады. Кейін оны өзі де мойындаған. Өмірдің қызығын қарашы, қазір өзім осы Ұлттық ұлан академиясының намысын айтыста қорғап жүрмін, – деп ағынан жарылды Жұмабек.

Жұмабек айтыс өнерінің шыңын бағындыру жолында жүргенде әскерге шақырту алады. Жел өтіндегі, ел шетіндегі Күршім шекара жасағынан бір-ақ шығады. Елімізге әйгілі Катон­қарағай өңірінде азаматтық борышын атқарады. «Алқабек», «Қарашілік» шекара застава­ла­рында жүріп кинолог маман­ды­ғын меңгереді.

Әскерден келген соң Ұлттық ұланның әскери бөлімдеріне жас жігіттерді келісімшарт негізінде жұмысқа қабылдап жатқанын естиді. Әскери билет қалтасында, біржылдық дайындығы бар Жұмабек көп ойланбай ел арасында «Жамансопка» аталып кеткен ҚАЖ мекемелерін күзететін 6637 әскери бөлімнің үшінші жеке атқыштар ротасына қызметке орналасады. Сол жерде бөлімше командирі болып қызметін бастайды әрі қарай өзі қыр-сырын меңгерген кинолог мамандығы бо­йынша еңбек етеді. Қаракемердегі оқу құрамасында мамандығы бойынша білімін жетілдіреді. Кейін 6636 әскери бөлімінің Державинсктегі жеке атқыштар рота­сына ауысады. Ол бөлімше жабылған соң, 6637 әскери бөлімінің жедел мақсаттағы ротасына ауысады. Қандай қызмет атқар­сын өзін жауапты әскери қызметкер ретінде көрсетеді.

– Мерзімді қызметті атқар­ғанда әскери саланың қыр-сырын танып-білдім. Жарғыға сай жауап беруді меңгердім. Кейін келісімшартпен қарауыл қызметіне кіріскенде тіпті әскери адамға айналдым. Өйткені қара­уыл қызметі үлкен жауап­кер­шілікті талап етеді. Қарауыл қыз­ме­тінен кейін қоғамдық тәртіп пен қауіп­сіздікті қамтамасыз ету бойынша қызмет түріне ауыстым. Сонда да өзімнің ақындық өнерімді бірге алып жүрдім. Басшылық оны байқаса ке­рек, кейін маған Ұлттық ұлан ака­де­­­миясындағы жүргізуші қыз­метін ұсын­­ды. Бүгінде толық бір мұра­жай­ды­ басқаруды сеніп тапсырды. Бұл да­ өте қызық әрі ­жа­уапты қыз­мет, – дей­ді ол.

Жоғарыда айтып өткендей, кейіп­керіміз академия атынан, жалпы Солтүстік Қазақстан облысының атынан айтыстарға қатысады. Бала кезінде арман­даған мақсатына қол жеткізді. Біржан сал Қожағұлұлына арналған республикалық айтыс­та 1-орынды иеленді. Еліміздің түкпір-түкпірінен келген кіл мықты ақындардың арасынан жеңімпаз атанды. Алматыда өткен «Асыл домбыра» командалық айтысында Солтүстік Қазақстан облысының намысын жыртып, жақсы жетістіктерге қол жеткізді.

– Артыңда елің тұрғанда, елдің аманаты тұрғанда ақынға қате­­лесуге болмайды. Әскери қызметте де солай.­ Адам баласы артында елі, жері тұр­ғанын сезінгені дұрыс. Жауап­кер­шілік бар жерде нәтиже бар. Жауын­гер­лік рухымыз мықты болғанда сөзіміз салмақты болады, – деп өз ойын аяқтады Жұмабек.

Дарын СЕЙІТОВ