Ішкі істер органдары құқық бұзушылықтарға, оның ішінде тұрмыстық зорлық-зомбылыққа төзбеушілік қағидатын қамтамасыз ету жөнінде шара қабылдап жатыр. Бұл туралы Ішкі істер министрлігінде «Тұрмыстық зомбылыққа – нөлдік төзімділік» тақырыбында өткен онлайн брифингте айтылды.
Президент тапсырмасына сәйкес тұрмыстық зорлық-зомбылық жасау фактісі үшін жауапкершілік күшейтіліп, қылмыстық және әкімшілік кодекстерге түзетулер енгізілді. Әкімшілік полиция комитеті төрағасының орынбасары Ренат Зұлқайыровтың айтуынша, былтыр 1 шілдеден бастап полиция тұрмыстық құқық бұзушылықтарды тіркеуді өтініш беру сипатынан анықтау сипатына көшірді. Әрбір факті бойынша әкімшілік іс қозғалады. Ал соңғы құқықтық бағалауды сот береді. Бұл ретте құқық бұзушының сотта бір рет қана татуласуға құқығы бар.
Жаңа заңнама аясында былтыр екінші жартыжылдықта ғана тұрмыстық жанжалдар туралы 50 мың өтініш қаралса, 64 пайыз материал бойынша әкімшілік іс жүргізу қозғалды. Әкімшілік қамауға алынған адамдардың саны 2 есеге артқан. Сотта 27 мыңнан астам отбасы татуласыпты. Сонымен қатар министрлік зорлық-зомбылыққа ұшыраған отбасылармен профилактикалық жұмысты жандандыруға ден қойып отыр. Жәбірленушілердің қауіпсіздігін қамтамасыз ету мақсатында былтыр 87 мың қорғау нұсқамасы шығарылып, құқық бұзушының мінез-құлқына 15 мың ерекше талаптар белгіленді. Бүгінгі күні оларға полицияның күшейтілген бақылауы жүзеге асырылады. Ал шектеулерді бұзған 12 мың фактінің жолы кесілген.
«Қоғамда құқық бұзушылықтарға төзбеушілік қағидаты қалыптасып келеді. Осы саладағы құқық бұзушылықтар туралы хабарламаларды тіркеу 14 пайызға, оның ішінде тұрмыстық қылмыстардың төмендеу үрдісі байқалады. Кейбір полицияның репрессивтік шаралары тұрмыстық зорлық-зомбылық мәселесін шеше алмайды. Осыған байланысты Үкімет тұрмыстық зорлық-зомбылықтың алдын алу бойынша, яғни осы саладағы саясатты қайта қарау жөніндегі жол картасын іске асырып жатыр», дейді Р.Зұлқайыров.
Өңірлерде өмірлік қиын жағдайға тап болған отбасыларды анықтау бойынша мобильді топтар құрылған. Учаскелік инспекторлар 150 мың отбасын аралап, мемлекеттің көмегіне мұқтаж 500-ден астам отбасы анықталған. Әкімшілік полиция комитетінің ерекше тапсырмалар жөніндегі аға инспекторы Ақмарал Серікбаеваның сөзінше, қазір тәулік бойы «111» және «150» жедел желісінің телефондары жұмыс істеп тұр. Әрбір қоңырау соққан жәбірленуші дер кезінде тиісті кеңес немесе қолдау ала алады. Сондай-ақ былтыр әйелдер мен балалардың құқықтарын қорғау, отбасылық құндылықтарды ілгерілету жөніндегі шараларды күшейту жөнінде заңнамалық түзетулер әзірленген. Бұл бойынша денсаулыққа қасақана жеңіл зиян келтіруді және ұрып-соғуды қылмыстық жауапкершілікке тарту жоспарланып отыр. «Ендігі жерде құқық бұзушының мінез-құлқына байланысты талап сотқа жіберіліп, агрессорды тұрғын үйден уақытша шығару мәселесі қаралады. Сонымен қатар оған әлеуметтік бейімделу орталықтарында өз іс-әрекеттерін уақытша қарастыру ұсынылады. Сондай-ақ сот агрессордың денсаулық сақтау ұйымдарында міндетті психокоррекциялық курстардан өтуін тағайындауға құқығы бар. Дәл осындай ерекше талаптар Қылмыстық кодекс шеңберінде де белгіленеді», дейді А.Серікбаева.
Айналада болып жатқан заң бұзушылықтарға көз жұма қарамауға шақырған ІІМ өкілі тәртіптің басы тәрбиеден басталатынын түсінген қоғамда қылмысқа төзбеушілік қағидаты қатаң сақталатынын жеткізді. «Ал полиция елдегі отбасындағы әрбір адамның құқығы аяққа тапталмауын қадағалап, кез келген зорлық-зомбылықтан қорғауға әрқашан дайын», деді спикер.