Ақтоғай ауданында әлеуметтік дүкендердің саны артып келеді. Мұндағы міндет – әлеуметтік маңызы бар азық-түлік тауарларының бағасын тұрақтандыру және төмен бағадағы азық-түлікті қолжетімді ету. Осы мақсатта жақында аудан орталығынан «Мөлдір әлем» дүкені ашылды.
Жаңа дүкеннің ашылуына аудан басшысы Руслан Кенжебеков қатысып, құттықтау сөзін жеткізді.
– Азық-түлік бағасын тұрақтандыру – халық қамы. Осы ретте мұндай дүкендердің септігі мол. Тұрғындардың қалтасын қақпай, тұрмысын түзеуге мүмкіндік береді. Бұл азық-түлік дүкенінің ерекшелігі – халық күнделікті бірінші кезекте тұтынатын азық-түлік өнімдерін төмен әрі белгіленген бағада сатып алады. Дүкен сөресінде тұрған азық-түліктер, расымен, әлдеқайда арзан. Халық игілігіне жарасын. Алдағы уақытта осындай дүкендер көптеп ашылса, қарапайым халықтың тұрмыс жағдайы жақсаратыны сөзсіз, – деді Руслан Айтыкенұлы.
Айта кетейік, «Мөлдір әлем» атты азық-түлік дүкенінің иесі жеке кәсіпкер Баян Ысқақова бағаны тұрақтандыру аясында «Айналым схемасы» тетігін іске асыру үшін «Сарыарқа ӘКК» АҚ арқылы қаражат алып отыр. Мұндай бағыттағы жұмыстар әрмен қарай жалғаса береді.
Қарағанды облысы,
Ақтоғай ауданы