Қарағандыдағы «Достық» үйінде халық ақыны Жәкен Байтуовтың «Бөрі батыр» дастанын жырлаудан облыстық жыршылар сайысы өтті. Ақын да, батыр да ұлықталған бұл байқаудың басты ерекшелігі мынада: екі аталымнан үздік шыққан қос жеңімпаздың жетегіне жылқы байлады.
Мәдени іс-шараны «Арқа» айтыс ақындары мен жыршы-термешілер мектебі ұйымдастырып отыр.
– Былтыр Кенесары бабамыздың 220 жылдығына орай жыршылар байқауын өткізгенбіз. Жас жыршыларымыз Доскей Әлімбайдың «Хан Кенесін», Нысанбай жыраудың «Кенесары-Наурызбай» дастанын жырлаған еді. Өте жоғары деңгейде өнер көрсетті дей аламыз. Биыл да Бөрі батырдың ұрпақтарымен бірігіп, Жәкен Байтуовтың дастанын насихат етіп отырмыз. Бұл іс-шарамыз арқылы ақынды да, батырды да ұлықтай алдық, – дейді айтыскер ақын Айтбай Жұмағұлов.
Жыршылар сайысына өңіріміздегі отыздан астам өрен қатысып, бақтарын сынады.
Жыршы, профессор Ерболат Шалдыбеков Астанадан арнайы келіп қатысып, қазылар алқасына төраға болды. Белгілі профессор сайыстың қорытынды кезеңінде Арқадағы жас жыршылардың талабына таңданысын білдіріп, жыршы-термешілер мектебіне сәттілігін тіледі.
Байқауға бас демеуші болған Аян Қиынбеков әулетінің атынан екі жылқы және Бөрі батыр ұрпақтары 1 миллион теңге қаражат берген. Ботақара қосымша білім беру руханият орталығының оқушысы Виктория Аленина байқаудың аспаппен жырлау аталымында қатарластарынан басым түсіп, бас бәйгеге, яғни жүлдеге тігілген жылқыға ие болды. Ал дастанды мәнерлеп оқу аталымында Қасым Аманжолов атындағы балалар музыка мектебінің оқушысы Кәміл Тілеуқабыл озық шығып, екінші жылқының иесі атанды. Байқауға қатысқан басқа да жүлделі орын алған өнерлі өрендерге ақшалай сыйлық үлестірілді. Мұнымен қоса, облыстық білім басқармасы ауылдың үш баласына Көкшетаудағы «Балдәурен» республикалық оқу-сауықтыру орталығына жолдама табыстады.
«Алғаш рет ат мініп тұрмын. Үйдегі ата-анам қатты қуанатын болды. Қазақ халқы құрметтілерге ат мінгізеді ғой. Соны жақсы ырымға балап тұрмын. Жыршы-термешілер сайысына үнемі қатысамын. «Бөрі батыр» дастанын домбырамен орындап бердім. Бүгінгі өнерім қазылар алқасының, көрермендердің көңілінен шыққанына аса қуаныштымын», деген әсерімен бөлісті байқау жеңімпазы Виктория Аленина.
Ұйымдастырушылар ұрпаққа рухани азық, жыр думан сыйлаған Бөрі батыр ұрпақтарына алғысын жаудырды. Бас демеуші Аян ақсақал да ақ батасын жаудырды.
– Біз бабамызды осылай ұлықтайық деп шештік. Ас пен тойдан гөрі осындай ұрпаққа игілігі бар дүние жасағымыз келді. Бөрі бабамыздың батырлығы осы бүлдіршіндердің бойына дарысын! Іс-шараны ұйымдастырған Айтбай Ботпайұлы және Дидар Қами бастаған азаматтарға ерекше ризамын! – деп ақ тілеуін жеткізді.
Қарағанды облысы