Қорғаныс министрі ел қауіпсіздігіне үлес қосқан әскерилерді «Ел қорғаны» медалімен марапаттады. Награда кейінгі үш айда бүтін мемлекетті тосырқатқан тасқын тұсында судан қорғауға үлес қосқаны үшін берілді.
Мұнайлы өңірдегі елді мекендерді тасқын судан қорғауға Қорғаныс министрлігі 30212, 5571, 6655, 82796 әскери бөлімдерінің, Төтенше жағдайлар министрлігіне қарасты 52859 әскери бөлімі және Ұлттық ұланның сарбаздары көмекке жеткен. Маңғыстау, Ақтөбе, Түркістан, Алматы, Қызылорда облыстық, Шымкент қалалық төтенше жағдайлар департаментінің қызметкерлері де жәрдемдескен.
Жылыойлықтар толассыз тасқынмен алысып жатқан тұста асарға үлес қосқандардың бірі – Тыныштықбай Тұртаев. Ол әскерилермен бірге Жем бойындағы алты бөгетті жарып, су ағысын Каспий теңізіне қарай бағыттаған. Сөйтіп тілсіз жаудың қарқынын бәсеңдеткен. Бүгінде бұл еңбегі еленіп, «Ел қорғаны» медалімен марапатталды.
– Аманатты арқалап, жерім деп жегіліп, елім деп еміреніп өту – Отанның ұландарына артқан ұлы міндеті. Міне, осы қағиданы ұстанып, елім үшін аянбай еңбек етіп келемін. Атырау облысы Құлсары қаласында су тасқыны кезінде кемерінен асқан өңірдегі өзеннің ағысын бұруға қол ұшын создық. Топырақ толтырылған қаптарды дайындау және төсеу жұмыстарына қатысып, мейлінше судан аман қалған шағын аудандарды сақтап қалуға атсалыстық. Сол сын сағатта ортада жүріп, ата-бабамыздан жалғасып келе жатқан ұлттық құндылығымыз – бірлік пен ынтымақтың нағыз үлгісін көрдік. Одан әрқайсымыз рухтанып, жігерленіп, бірлік пен талапты еңбекке салғанның нәтижесінде асау толқынды ауыздықтай алдық, – дейді 41433 әскери бөлімінің рота старшинасы.
«Ел қорғаны» медалі ерлігімен ерекшеленгендерге 2017 жылдан бастап беріледі. Награда екі дәрежеден тұрады. Яғни І дәрежелі медалімен Қазақстан Республикасының қорғаныс қабілетін, әскери қауіпсіздігін нығайтуға елеулі үлес қосқан Қарулы Күштерінің офицерлер құрамы мен азаматтары марапатталады. Ал ІІ дәрежелі медалімен Қазақстан Республикасы Қарулы Күштерінің сержанттар және сарбаздар құрамдарының әскери қызметшілері марапатталады. Бұл құрметке төтенше жағдайдағы табанды іс-қимылы үшін Қуаныш Ерғалиев те ие болды. Батыс Қазақстан облысының Бөкей Орда ауданына қарасты Сайқын ауылының тумасы алғаш әскери қызметке қалай келгенін еске алып, жастарды Отан алдындағы борышын өтеуге шақырды.
– Жоғары оқу орнына грантқа түсе алмадым. Ойланбастан, 2005 жылы әскери борышымды өтеуге аттандым. Содан 2007 жылға дейін Алматы облысындағы Қапшағай қаласындағы әскери бөлімде азаматтық міндетімді атқардым. «Армансыз адам – қанатсыз құспен тең» деген сөз бар емес пе? Сол секілді әскери адам болуды бала кезімнен армандадым. Мектепте оқып жүргенде десанттық шабуылдарға қатысты түрлі фильмдерді жиі көретінмін. Әрі елге қызмет етуді көп армандайтынмын. Үйдегі үлкендер де «Атаңның баласы болма, адамның баласы бол» деп жиі айтатын. Содан арманым мақсатыма айналды. Кейін әскери қызметте қалдым. Міне, 20 жылға жуық уақыт өтті, қазір өмірімді әскери формасыз елестете алмаймын. Жалпы, бұл әскери сала кез келген адамды тәртіп пен төзімділікке, батылдыққа, шыншылдыққа, әрі спортқа жақын болуға үйретеді. Ер адам қандай жағдай болсын, Отан алдындағы борышын ақтауға міндетті, – дейді Қуаныш Ерғалиев.
Расымен, тепсе темір үзетін, дені сау жігіттер Отан алдындағы борышын өтеуге міндетті. Әскерге баруға құлықсыз жастардың әрекетінен Президент Қасым-Жомарт Тоқаев та хабардар. Сол себепті жауаптыларға насихат жұмыстарын күшейтуді тапсырған-ды. Қазір әскерге барған жастарға бірқатар жеңілдік қарастырылады. Соның бірі – әскери борышын өтеп келген азаматтар жоғары оқу орнына жеңілдікпен түседі. Сондай-ақ мерзімді әскери қызметтегі сарбаздар несиесін төлеу міндетінен уақытша босатылады. Олар өздері қаласа, армия қатарынан нақты мамандық та алып шығады.