«Игі істер марафоны» аясында елімізде «Экология» апталығы өтті. Осыған орай Маңғыстау облыстық жастар саясаты мәселелері жөніндегі басқармасы мен Мұнайлы аудандық жастар ресурстық орталығы «Таза Like» сенбілігін ұйымдастырды.
Тазалық іс-шарасы Мұнайлы ауданының Атамекен аулы маңындағы «Өлі көл» полигонында өтті. Іс-шараға 10-ға жуық техника жұмылдырылып, 150-ге жуық жас қатысты. Нәтижесінде, Мұнайлы ауданынан 45 тоннаға жуық қоқыс шығарылды. Сенбілік апталығы тек мұнымен шектеліп қалмай, апта бойы әр орында жалғасын табады.
«Таза Қазақстан» акциясы аясында көктемде бүкіл ұжым, кәсіпорындар ауыл, қала іші, теңіз жағалауынан бастап, шалғайдағы тарихи-мәдени ескерткіштерге дейін назардан тыс қалдырмай тазалық жұмысын жүргізді. Өкініштісі, арада көп уақыт өтпей-ақ есіл еңбектің зая кеткенін байқадық. Ақтау қаласындағы Каспий теңізі жағалауында қайтадан сусыннан босаған пластик, қалбыр, шыны ыдыстар, темекі, балмұздақ қораптары, тіпті аяқкиімдер мен өзге де неше түрлі қоқыстан көз тұнды. «Өлі көл» полигонында жүргізілген сенбілікте маңайдың аз уақытта қайтадан қалдыққа бөгіп қалғанын байқап жағамызды ұстадық. Бас-аяғы екі-үш айда адам айтса нанғысыз көлемде қайтадан қоқыс басып қалыпты. Неге бұлай? Тұрғындардың бұл әрекеті – еш ақтауға келмейтін іс. Мұндай жауапсыздықты, тіпті қоршаған ортаға деген қатыгездікті қалай тоқтатуға болады? Аталған акция, сенбіліктер ұйымдастырылмаса, әп-сәтте өкпесі қабына қоқыспен демалатын елге айналып шыға келгендей екенбіз. Қайтпек керек?
Маңғыстау облысы