Кейіпкеріміздің әу бастағы мамандығы – қаржыгер. Әл-Фараби атындағы ҚазҰУ-дың Есеп және аудит факультетін тәмамдаған ол өз саласы бойынша мүлде жұмыс істемеген. Диплом бойынша қызмет қумаған Рахима Исағұлованың бүгінгі кәсібі ешкімге ұқсай бермейді. Елімізде алғаш рет ұлттық нақыштағы кебіс-мәсі тігу ісін бастаған Рахиманың өнімі бүгінде көпшілік арасында сұранысқа ие болып отыр.
Кәсіпкер келіншек 2016 жылдан бері кебіс-мәсіні оюлап, түрлі таспен әшекейлеп тігіп, сатылымға шығара бастаған. Бұған дейін мұндай аяқкиімдер отандық нарықта болмаған. Алғаш деп айту себебіміз де сол.
«Сол жылы үшінші баламмен декреттік демалыста отырған кезімде «Қандай жұмыспен айналыссам екен?» деп ойландым. Жолдасымның жалақысы күнкөріске жете қоймайтыны анық. Сөйтіп жүргенімде Instagram желісінен Өзбекстандағы жәрмеңкеде әшекейлі кебістердің тұрғанын көріп, «Осыларды неге өзімізде тікпеске?» деген ой келді. Оған үлкен қаржының да қажеті жоқ еді. Көп ұзамай баланың жасқа толғанға дейін түсіп тұратын жәрдемақысының 20 мың теңгесіне базардан 3 кебіс сатып алдым. Оның сыртын оюлап, әшекейлеп тігіп, дайын өнімді өз Instagram парақшама жариялап, тапсырыс қабылдайтынымды хабарладым. Одан кейін мәсілерді де базардан сатып алып келіп, сыртын дәл солай сәндеп сата бастадым», дейді.
Рахима тігіншілік, дизайнерлік өнерді еш жерден меңгермепті. Бұл кәсіпті бастар сәтте өз түйсігіне ғана сенім артқан.
«Әулетте атам етікші болған. Мұндай ісмерлік сол кісіден даруы әбден мүмкін. Бүгінде мәсіні арнаулы цех арқылы тек былғарыдан тіктіреміз. Қазір осы өнімнің жазда киетін жүнсіз түрі, қыста киетін қой жүнімен және жасанды жүнмен астарланған түрлері бар. Сондай-ақ қонышы ұзын және қысқа, табаны шегеленген және жұмсақ деген сияқты бірнеше түрі бар. Сапасына қарай бағасы да әртүрлі. Ал сыртына әдемі тасын, оюын қойып, жұбайым екеуміз үйден сәндейміз. Ең алғашында бір күнде бір мәсіні әуре ететінбіз. Қазір бір сағатта тігетін болдық. Қолымыз әбден жаттыққан», дейді Рахима.
Отбасылық кәсіп арқылы тігін өнерін қосымша табыс көзіне айналдырған ерлі-зайыпты «Qurym masi» брендін жан-жаққа танытып отыр. Айта кететін бір жайт, кейіпкеріміз кәсібін кең көлемде дамыту үшін мемлекеттен қаржылай қолдау алмапты.
«Жаз мезгілінде мәсі көп сұранысқа ие емес, сондықтан күніне 1-2 дана ғана тігеміз. Айына 300 мыңдай пайда түседі. Тапсырыс көп түсетін уақыт – күз бен қыстың алғашқы айлары. Ол уақытта күніне 10 мәсіден көп тігеміз. Ең арзаны – жаздық мәсілер. Кебіссіз, қарапайым түрі – 12 мың, ал кебісімен, оюланған түрі – 18 мың теңге. Ең қымбаты – қойдың жүнімен астарланған және табаны шегеленген түрі. Негізінен жұрт оны желтоқсанда, Жаңа жылда үйдегі үлкендеріне сыйлық ретінде алады. Содан соң 8 наурыз, Көрісу, Наурыз мерекелері қарсаңында жақсы өтеді. Мұндай уақытта айына 2-3 миллион теңге таза пайда түсіруге болады. Ал кебіс-мәсінің дизайны тұтынушы сұранысына байланысты тігіледі», дейді шебер келіншек.
Ұлттық нақыштағы аяқкиімге тапсырыс елдің әр өңірінен түседі. Тіпті шетелден, мысалы, АҚШ, Қытай, Ресейге алып кеткен отандастарымыз да болған. Шебердің кебіс-мәсілері бірқатар сән үйінің сауда нүктелеріне де қойылған. Олар шеберден өз құнына алып, үстінен сәл ақы қосып сататын көрінеді.
Кәсіпкердің енді бір мақсаты бар, ол – ұлттық нақышта кебіс пен мәсіні сәндеп тігуден шәкірт тәрбиелеу. Бар білгенін үйретем деген Рахима мұндай ұлттық кәсіптің әр өңірде дамуын шын қалайтынын да айтып отыр.