Өзге салалар секілді медицина әркез жоғары технологиялық құрал-жабдықтарға зәру. Демек денсаулық сақтау саласындағы инновациялық жобалардан ұтпасақ, ұтылмаймыз. Мұны жақсы білетін «QazBioPharm» ұлттық холдингі шетелдік компаниялармен ауқымды жобаларды үйлестіруге ниетті.
Мұны біз бірер күн бұрын «QazBioPharm» мен қытайлық «Beijing Genomics Institute» компаниясы «Инновациялық геномдық және омикалық технологияларды енгізу және дамыту» тақырыбында өткен инновациялық форумда білдік. Форумға Президенттің ғылым және инновациялар мәселелері жөніндегі кеңесшісі Күнсұлу Закария, Денсаулық сақтау министрі Ақмарал Әлназарова, «BGI Group» бас директоры Инь Е және жетекші ғалымдар, мемлекеттік және жеке ұйымдардың өкілдері қатысты.
Бұл күні холдингтің еншілес ұйымы саналатын Ұлттық биотехнология орталығының базасында геномдық зертхана ашылды. Қонақтар жоғары технологиялық зертханаларды тамашалады. Осы тұста министр Ақмарал Әлназарова бұл қадамды ғылымның даму жолындағы тағы бір үлкен жоба деп түсіндірді. Ізінше, тараптарға алғыс айтып, табыс тіледі.
«QazBioPharm» зерттеу орталықтары жыл өткен сайын жаңарып, зертханалары толығып келеді. Әрине, көштің алдында болуды ойласақ, қазірден бәсекеге қабілетті болу қажет. Ал «BGI» компаниясының әлем елдері қызығып отырған инновациялары көп. Білікті кадр даярлау ісіне де бейжай қарауға болмас. Сондықтан «QazBioPharm» BGI-мен бірге жаңа бағыттар бойынша маман даярлауға ниетті. Осы тұста «Qazіnnovations» инновацияларды дамыту жөніндегі Ұлттық агенттігі» АҚ басқарма төрағасы Санат Жолдыхан инновациялық жобалар туралы пікір білдірді.
– Бүгінгі инновациялық форумның мән-маңызы жоғары. Өйткені біз осы күнге дейін шикізат өндіретін ел болып танылсақ, келешекте жоғары технологиялық инновациялық жағынан дамыған елдердің қатарында болуымыз керек. Осы бағытта дамысақ, біздің жаһанда бәсекеге қабілетіміз артады. Инновация мен технологияларды жаңа деңгейге көтеретін сәт келді. «BGI» – алып компания. Бүгін, міне, біздің елмен бірлесіп зертхана ашып отыр. Мұндай тәжірибелер елде көп болуы керек. Қазір барлық технология автоматтандырылған. Бірте-бірте осыған көшу – заман талабы. Медицинада технологияларды дамыту – мемлекет көңіл бөліп отырған басым бағыттардың бірі. Мұны саладағы атқарылып жатқан жұмыстардан білуге болды. Еліміз осы нарықтан өзінің орнын табуы керек, – дейді С.Жолдыхан.
«QazBioPharm» ұлттық хол-дингінің бас директоры Ерғали Әбдірайымовтың айтуынша, елде бұрын балама құрылғылар болғанымен дәл осындай әлеуеті зор зертхана болмапты. Холдингтің басшысы әлеуеті жоғары технологиялардың мүмкіндігін жарым-жартылай емес, толық пайдалануға мүдделі екенін байқатты.
– Әлемде қолданылып жатқан технологиялардың көмегімен біз баламалы диагностикалық жүйені жақсартамыз деп отырмыз. Өйткені кейінгі жылдары перинаталды диагностика және қатерлі ісіктердің алдын алу диагностикасы өте күрделі болып тұр. Біздің ел үшін де бұл өзекті. Бүгін біз «BGI» компаниясымен бірге зертхана ашып отырмыз. Мұндағы жұмыстар бірден емес, кезең-кезеңімен іске асады. Біз аса ауыр сырқаттарды анықтау үшін осы зертхананың мүмкіндігін толық пайдалануды ойлап отырмыз. Ол үшін әлі қосымша қондырғылар толықтырылады. Зертхана кеңейеді, әлі талай зерттеулер жүргізіледі. Бізге қазір жеткізілген құрылғылардың бағасы да әжептәуір қымбат. Жұмыстың алғашқы кезеңінде өзіміздің мамандарды тартамыз. Сосын жұмыс барысында «BGI»-мен бірге қосымша тағы маман даярлаймыз, – деді Е.Әбдірайымов.