Ақадыр кентіндегі «Caramel» кондитер кешенінің дәмі тіл үйіретін тәтті өнімдеріне сұраныс жоғары. Алғашында кәсібін үйде бастаған Әсел Ерболқызының ісі бүгінде өрге домалаған. Үлкен цехтың жұмысы өнімді. Қомақты тапсырыстар қабылдайды.
Кәсіпкер Әсел бала кезінен асүйге жақын өсіпті. Қолы қалт етсе, шайға түрлі торт, бәліш пісіруді әдетке айналдырып алған. Алғаш «Бал» мен «Ханымның саусақтары» тортын әзірлеуді үйреніпті. Ол кезде қазіргідей кондитер өнімдерін әзірлейтін цех жоқ. Қазақтың той-қуанышы көп болған соң, тапсырыс төпелеп түсе бастайды. Әрмен қарай мәзірін молайтқысы келеді. Содан орыс тілінде шығатын «Люблю готовить» («Тағамды дайындауды ұнатамын») деген шағын журналды іздеп жүріп сатып алып отырған.
Кейіннен интернетке қол жеткен соң түрлі тәтті тоқаштардың құрамын, жасалу жолын содан алады. Сөйтіп, торттың, тәтті десерттің түр-түрін пісіруді үйренеді. Бірте-бірте асүйінен шағын цехқа ауысады. Кәсібі одан сайын дөңгелеген Әсел Ерболқызының қарамағында 24 адам жұмыс істейді.
Сатылымды ұйымдастыратын менеджерлер, аспаздар, кондитерлер, дүкенші-кассирлер, салат, нан қамырларын дайындаушылар, бәліш, печенье пісірушілер, әлеуметтік желіге жауап беретін маман, мобилограф бәрі цехтағы жұмыс көрігін қыздырады. Екі көлік жүргізуші жеңіл көліктерімен тапсырыстарды тегін жеткізіп береді. Соның арқасында кәсіп өркендейді.
Кондитерлік цех пен жылдам тамақтану бөлімінде торттың 35, пирогтің 25, рулеттің 9, чизкейктің 10, пирожныйдың 35, пиццаның 6 түрі пісіріледі. Мұнымен қоса мәзірінде бургер, кекс, хот-дог, самса, чебурек, бәліш, тоқаш, тағамдардан манты, тұшпара, вареник, лағман, думляма, қазан-кебаб, фри бар.
«Кулинарлық тәттілерге, ыстық астарға тапсырыс өте көп. Үлгермей жатамыз. Тіпті кейбір тапсырыстан бас тартуға тура келеді. Кеңірек етіп кофехана ашсақ деген ой бар. Өйткені халық, әсіресе жастар сондай жердің болғанын қалайды. Отбасымен, балаларымен келіп тәтті бәлішпен кофе, шай ішкілері келеді. Туған күн, басқа да мереке күндері жиналады», дейді кондитер цехының басшысы.
Білікті аспаз арнайы курс ашып, кенттің жастарына шеберлік сабақтарын жүргізеді. Одан дәріс алған жиырмаға тарта жас үйлеріне кент тұрғындарынан жеке тапсырыстар алып, кәсіптерін жалғастырып жатыр. Кәсіпкер қайырымдылық шараларын да назардан тыс қалдырмайды. Ол жағдайы төмен отбасыларға, мүмкіндігі шектеулі жандарға қаржылай көмек көрсетеді. Кент ішінде өтетін мәдени және спорттық іс-шараларға үнемі демеушілік жасайды.
Аудан экономикасының өркендеуіне айтарлықтай үлес қосып жүрген, халықтың той-қуанышына тәтті өнімін ұсынып жүрген «Caramel» кондитер цехы әлі де дамып, жетіле түсуді көздеп отыр.
Қарағанды облысы,
Шет ауданы,
Ақадыр кенті