Еліміз бойынша натрий цианидін өндіретін алғашқы зауыт Талас ауданының аумағына салынған еді. Өткен жылы «Talas Investment» ЖШС шет мемлекеттерден тасымалданатын шикізатқа деген тәуелділікті түбірімен жойды. Алтын өндірісіне айрықша қажетті бағалы металды басқа қоспалардан ажырату үшін қолданылатын реагент Жамбыл облысында өндіріліп жатқанына да он жылдан асты.
2014 жылы іске қосылған зауыт жыл өткен сайын өндіріс көлемін арттырып, құлашын кеңге сермеді. Кәсіпорын қазір өңір экономикасына айтарлықтай табыс түсіріп отыр. Мұнда өндірілетін натрий цианиді мен аммоний сульфаты отандық нарықты қамтып қоймай, бірнеше шет мемлекетке сатылады. Зауыт басшылары келтірген дерекке жүгінсек, кәсіпорынның жылдық қуаты 15 мың тонна натрий цианидін өндіруге қауқарлы. Сұраныс болса, бұл межені бағындыру қиын емес. Жүздеген азаматты тұрақты жұмыспен қамтып отырған зауыт жұмысын ілгерілету бағытында да ауыз толтырып айтарлықтай жұмыс атқарылып жатыр.
Біршама уақыт бұрын серіктестікке қарасты натрий цианиді зауытының екінші кезеңінің құрылысы басталды. Құрылыс жұмысы жоғары қарқынмен жүргізіліп жатыр. Дерекке жүгінсек, жұмыс алдағы жылы толыққанды аяқталуға тиіс. Нәтижесінде, кәсіпорынның өндірістік қуаты екі есе артады.
«Серіктестікке қарасты натрий цианиді зауыты екінші кезеңінің жұмысы белсенді жүріп жатыр. Құрылыс жұмыстары толық біткеннен кейін зауыттың өндірістік қуаты 30 мың тоннаға жетеді», дейді серіктестік басшысының орынбасары Әбдіғали Жүнісов.
Осыдан соң компанияның қаржылық ахуалына тоқталған орынбасар: Жоба іске қосылғаннан кейін 300 жаңа жұмыс орны ашылады. Құрылыс жұмысын жүргізу үшін жеке қаржыдан бөлек, «Қазақстан даму банкі» мен «Бәйтерек» холдингінен инвестиция тартылды. Қысқасы, екінші кезең жұмысы аяқталғаннан кейін жылдық өнім көлемі айтарлықтай артады», деп өз сөзін түйіндеді.
«Talas Investment Company» ЖШС директорының орынбасары келтірген дерек бойынша, зауыт өткен жылы 13 800 тонна натрий цианидін, 4 666,500 тонна аммоний сульфатын өндіріп, отандық нарыққа және экспортқа жөнелтіпті. Осы жылдың тамыз айына дейін 79 89,36 тонна натрий циандиді, 2 754,400 тонна аммоний сульфаты өндірілген.
«Тауарға негізінен Моңғолия, Қырғыз Республикасы, Тәжікстан мемлекеттерінен сұраныс артып отыр. Қазір кәсіпорында 624 азамат жұмыспен қамтылған. Олардың орташа жалақысы 292 362 теңгені құрайды», дейді Әбдіғали Жүнісов.
Өндіріс ошағы қалдықсыз технологияға негізделген. Кәсіпорынға қажетті шикізат ретінде газ бен кен қоспалары пайдаланылады. Зауыттың өңір экологиясына ешқандай зияны жоқ. Ал жоғары температурада ажыратылған аммоний сульфатын тыңайтқыш ретінде пайдануға болады.
Жамбыл облысы,
Талас ауданы