Биыл көрнекті балалар жазушысы, ғалым Бүркіт Ысқақовтың туғанына 100 жыл толып отыр. Балалар әдебиетінің дамуына өлшеусіз үлес қосқан ол – атақты ЕСЕП партиясын құрушылардың бірі. Автордың «Отан» өлеңін мектепте оқымаған, жаттамаған қазақ баласы жоқ шығар. Қаламгердің ғасырлық тойында Абай атындағы Қарағанды облыстық балалар кітапханасы игі іс-шараның ұйытқысы болды.
Қарағанды облысы-ның мәдениет, архивтер және құжаттама басқармасының қолдауымен қарымды қаламгердің мерейлі жылына тоқайластырып, кітапхана ұжымы наурыз айынан бастап қазан айына дейін «Шабыт шуағы» атты облыстық сахналық қойылым байқауын жариялаған еді. Қорытындысы Сәкен Сейфуллин атындағы Қарағанды облыстық академиялық қазақ драма театрында өтіп, драматургтің «Әлімнің әлегі», «Шыт көйлек», «Екі оқушы», «Ағалық ақыл» атты пьесаларын сахналады.
Бұл игілікті іс-шараға Алматыдан арнайы келген қазақ радиосының ардагері Айгүл Бүркітқызы жас өрендердің қазылығына төрағалық етті.
– Әкем – соңынан із қалдырған, сөз қалдырған тұлға. Оның жазбалары, өлеңдері атын өшірген жоқ. Облыстық деңгейде алғаш рет насихатталып жатыр. Соған Алатаудан көңілім алып-ұшып арнайы келдім. Пьесаларын қарашаңырақ Сәкен театрында жас өнерпаздар өте жоғары деңгейде сахналап шықты. Әр пьесасы өнегеге толы екен, – дейді ақынның қызы.
Өрендердің өнеріне Е.Бөкетов атындағы Қарағанды зерттеу университетінің докторанты Әділет Жағыпар, Қарағанды мемлекеттік медицина университетінің ұстазы, филология ғылымдарының кандидаты, профессор Баян Ибраева, Мәдениет қайраткері, С.Сейфуллин атындағы Қарағанды облыстық академиялық Қазақ драма театрының актері, режиссер Бекмұхамет Киекбаев баға берді.
Сонымен «Шабыт шуағы» облыстық сахналық қойылым байқауында I орынды Нұра ауданы, Изенді ауылының талантты оқушылары иеленді. ІІ орынға Қарағанды қаласындағы Ж.Ақбаев атындағы жалпы білім беретін мектеп оқушылары лайық деп танылды. ІІІ орынды Осакаров ауданы Молодежный кентінің мектебі мен Қарағандыдағы №36 жоғары мектеп оқушылары иеленді.
Мұнымен қоса, жан-жақтан пьесаны сахналап әкелген балдырғандарға арнайы аталым бойынша да марапат табысталды. «Үздік қойылым» аталымы М.Мамыраев атындағы №68 мектеп-интернатына бұйырса, «Үздік декорация» аталымына Приозерск қаласы №2 мектеп лайық деп танылды. №53 мектеп-лицейінің оқушысы Сабыр Шыңғыс «Үздік актер», Ақтоғай ауданындағы К.Байсейітова атындағы мектептің оқушысы Ділназ Сағындық «Үздік актриса» атанды. «Үздік образ» аталымын Қарағандыдағы Ғ.Мұстафин атындағы мектеп оқушысы Ринат Ғалымжан жеңіп алды.
Айгүл Бүркітқызы шалғай ауылдардан келген талапты балаларға өз атынан қаржылай сыйлық тарту етті. Жеңімпаздар мен жүлдегерлерге облыстық мәдениет, архивтер және құжаттама басқармасының арнайы дипломы мен қаржылай сыйлығы үлестірілді.
Айдың аяғында ақынның туған жері Нұра ауданында «Бүркіт Ысқақұлы: тұлға тағылымы мен тарихи заманы» атты республикалық ғылыми–практикалық конференция өтетіні белгілі болды.
Академик Мұхамеджан Қаратаев: «Бүркіт Ысқақовтың «Тас еденнің ызғары» атты өлеңдер топтамасының қазақ поэзиясынан алатын орны ерекше. Оның бұл өлеңдерінен Сәкеннің сыры, Бейімбеттің мұңы, Ілиястың үні естілгендей болады», деп баға берген.
Күрескер тұлғаның есімі көмескіленбей, аты республика көлемінде ардақталуы керек деп ойлаймыз.
Қарағанды облысы