Талдықорған қаласына қарасты Өтенай ауылында дәрігерлік амбулаторияның құрылысы жүргізіліп жатыр. Жол картасы аясында қолға алынған маңызды әлеуметтік нысанның жұмысы депутаттар мен жергілікті билік өкілдерінің бақылауында. Одан бөлек, облыс орталығында тың медициналық әдістер тәжірибеден өтіп, жергілікті мамандар шетелдік дәрігерлерден дәріс алады.
Өңірде кейінгі жылдары бірнеше емханаға жаңғырту жұмыстары жүргізілді. Кейбір шалғай ауылдар жаңа медициналық нысанға қол жеткізді. Өтенайлықтар осы күнге дейін іргетасы 1986 жылы қаланған ескі ғимаратта ем қабылдап жүрді. Мұнда сапалы медициналық көмек алу, дәрігерге қаралу, жатып ем қабылдау жағы дұрыс қарастырылмаған. Сондықтан округтегі 17 мыңнан аса халықтың тең жартысы қалалық ауруханаларда тіркелген. Жылдан жылға тұрғын санының артуына байланысты аймаққа дәрігерлік амбулаторияның қажеттілігі туындап отыр.
«Ауылымызда заманауи амбулаторияның ашылатынына халық дән риза. Енді ауыл тұрғындары Талдықорғанға, қалалық емханаларға барып әуре болмайды. Құрылыстың 80%-ы аяқталды. Сапалы жүріп жатқанына жіті көз жеткізіп, нысан қолданысқа берілген күнге дейін партиялық бақылауда ұстайтын боламыз», дейді облыстық мәслихаттың депутаты Қайрат Кереев.
Бас мердігер «Жаркент алғыр» ЖШС-мен өткен жылы келісімшарт жасалған. Бүгінде құрылыс алаңында 20-25 маман еңбек етіп жүр. Жоспар бойынша амбулатория 2025 жылдың мамыр айында пайдалануға беріледі.
Жаңа емхана Өтенай ауылынан бөлек, «Ынтымақ», «Жастар-1», «Жастар-1/1», «Жастар-2» тұрғын үй алабының халқына да қызмет етпек. Айта кетелік, өңірде ауылдық жерлердегі медицина құрылғыларын дамыту жұмыстары да жүріп жатыр. Облыстық денсаулық сақтау басқармасының өкілдері шетелдік әріптестерімен тығыз байланыс орнатқан. Ондағы мақсат – операция жасаудың жаңа әдістерін үйрену. Мәселен, облыстық онкологиялық клиника базасында Израильден келген халықаралық мамандардың қатысуымен HIPEC аппаратымен операция жасау жөнінде шеберлік сабағы өтті. Дәрігерлерді HIPEC тәсілімен емдеуді үйретуге Израильден «Хайм Шиба» медициналық орталығының хирургия және хирургиялық онкология бөлімінің аға хирургі, медицина ғылымдарының докторы Альмог Бен-Яаков келді. Сондай-ақ компанияның өкілі, инженер Вячеслав Иванов та операцияға қатысты. Шетелден келген білікті мамандарды емхана дәрігерлеріне клиниканың директоры Мадияр Өмірбаев таныстырды.
Тәжірибеде онкология мамандары гипертермиялық интраперитонеальді химиялық терапия технологиясы арқылы сүт безі, асқазан, тоқ ішек обырын аралас емдеудің жаңа, жоғары технологиялық әдісін көрсетті. Облыстық онкологиялық клиника гипертермиялық интраперитонеальді химиоперфузия әдісін алғаш қолданған өңірлік онкологиялық орталық. Облыс әкімдігі мен денсаулық сақтау басқармасының қолдауымен 2024 жылдың қазан айында жаңа медициналық жабдық HIPEC аппараты сатып алынған еді. Гипертермиялық интраперитонеальді химиотерапия – онкологияны емдеудің инновациялық әдісі. Ол барлық ісік ошағын хирургиялық тәсілмен алып тастап, іш қуысына 42-43 °C дейін қыздырылған химиялық препарат енгізеді. Ол перитонеальді канцероматозға (рак клеткаларының зақымдануы) қолданылады. HIPEC пайда болғаннан кейін операция жасауға жатпайды деп саналған қатерлі ісікті емдеу мүмкін болады.
Альмог Бен-Яаков журналистерге берген сұхбатында клиникаға келгенде операция жасауға мүмкіндік бар ма екен деп қобалжығанын жасырмады. Бірақ қатерлі ісікке заманауи тәсілмен операция жасауға кіріскенде барлық құрал-жабдық, мүмкіндіктің талапқа сай екенін көріп қуанғанын, операцияның сәтті жасалғанын айтты.
«Бір үйдің баласындай түсіністікте, ынтымақта, сыйластықта жұмыс істейтін ұжымда, ортада ғана ем нәтиже береді. Министрлік, басқарма, клиника бір-бірін жарты сөзден түсініседі. Ем жасауға келгенде білек сыбана кіріседі. Барлығының мақсаты – обырға шалдыққан адамдарға көмектессек деген ой», дейді А.Бен-Яаков.
Халықаралық дәрежедегі шеберлік сағаты дәрігерлерге үзілген үмітті ұштайтын әдісті үйретті. Жаңа тәсіл қатерлі ісікті емдеуге барынша мүмкіндік туғызады деген сенім бар.
Жетісу облысы