Осыдан бір ғасыр бұрын қазақ даласын суретке түсірген фотографтардың бірі – Сергей Прокудин-Горский. Бір таңғаларлығы, оның суреттері негізінен түрлі-түсті.
Прокудин-Горский Ресейдегі ғана емес, әлемдегі алғашқы түрлі түсті фотосурет шығарушылардың бірі саналады. Себебі ол фотограф қана емес, химик һәм өнертапқыш еді. Атақты химик Дмитрий Менделеевтің өзінен дәріс алған. Кейін Германия, Франция секілді Еуропа елдеріне барып, фотохимия мен түрлі түсті фотография технологияларын меңгерген. Соның арқасында қалыпты ақ-қара түстен арылып, түрлі түсті фотосурет шығаруға ден қойған.
Оның фотосуреттерін көрген адам бірден «бұлар кейін қолдан бояған суреттер» дейтіні анық. Алайда ешқайсысына бояу тимеген, бәрі де түпнұсқа фотосуреттер. Прокудин-Горский фотосуреттерін арнайы технология арқылы түсірген. Ол уақытта қазіргі цифрлық камералардағыдай бірден түрлі түсті сурет түсіру мүмкіндігі болған жоқ. Сол себепті фотограф бір көріністі бірнеше рет түсіріп шыққан. Бірін қызыл, енді бірін жасыл, тағы бірін көк сүзгілер (RGB) арқылы түсіретін әдісті қолданған. Сосын осы үш негативті бір-біріне дәл келтіріп, қосқан кезде табиғи түрлі түсті фотосурет шыққан. Қазір машақаты көп жұмыс көрінгенімен, ол уақытта суретті дәл осындай тәсілмен түсіру озық технология саналды.
Түрлі түсті фотосурет түсіруге әбден машықтанып алған соң, Прокудин-Горский Ресейдің өңірлерін суретке түсіруді алдына мақсат етіп қояды. Тіпті оның бұл идеясын сол кездегі Ресей патшасы II Николай да қолдайды. Сөйтіп, оған қолдау ретінде арнайы жабдықталған теміржол вагонын береді. Фотограф сол вагонды өзінің зертханасына айналдырады. Осылайша, 1909–1915 жылдары фотограф Ресейдің түкпір-түкпірін аралап, қалалар мен ауылдарды, мешіттер мен шіркеулерді, теміржолдар мен зауыттарды, табиғат көріністерін, әртүрлі ұлт өкілдерінің тұрмыс-тіршілігін, тарихи ескерткіштерді суретке түсіреді. Оның арманы мектеп оқушыларына елдің тарихы мен мәдениетін түрлі түсті фотосуреттер арқылы таныстыру болатын. Осы арманына қол жеткізіп, ХХ ғасыр басындағы Ресей халықтарының өмірін бейнелейтін бірегей фотожинағын жарыққа шығарады. Альбомда қазақ тұрмысына қатысты суреттер де бар.
Прокудин-Горский осыдан 110 жыл бұрын, яғни 1911 жылы қазіргі еліміздің біраз өңірінде болған. Түркістан өлкесіндегі, Сыр бойындағы қалаларды, сәулет ескерткіштерін, сондай-ақ қазақ халқының тұрмысы мен этнографиясына қатысты суреттер түсірген. Сол себепті оның фотомұрасы қазақ зерттеушілеріне де құнды. Бүгінде оның суреттері АҚШ-тың Конгресс кітапханасында сақтаулы.