Тағы бір жетекші ел белгілі

Украина 2013 жылғы ЕҚЫҰ төрағалығына сайланды 2013 жылы Украина Еуропадағы қауіпсіздік және ынтымақтастық жөніндегі ұйымға төрағалық ететін болады. Мұндай шешімді ЕҚЫҰ-ға қатысушы 56 мемлекеттің сыртқы істер министрлері консенсус негізінде “тыныштық рәсімі” арқылы қабылдады. ЕҚЫҰ-да қалыптасқан дәстүрге сәйкес, болашақ төрағалық туралы шешім төрағалық басталуына екі жыл қалған кезде қабылданады. Еске сала кетейік, Қазақстаннан кейін ЕҚЫҰ-ға 2011 жылы Литва, ал 2012 жылы Ирландия басшылық етеді. Енді, міне, 2013 жылдың төрағалығы белгілі болды. “Украинаны ЕҚЫҰ-ға 2013 жылы төрағалық ететін жоғары лауазымға сайлануына орай шын жүректен құттықтаймын. Біздің украиналық әріптестеріміз бен дос­та­­рымызға осынау жауапты мис­сия­ны атқаруда табыс және алдын­дағы болған төрағалардың жаңа гео­саяси шындық жағдайында ЕҚЫҰ-ны нығайтып дамыту бой­ынша күш-жігерін лайықты жал­ғас­тыруды тілейміз”, – деп мә­лім­деді Ұйымның Іс басындағы тө­р­ағасы, Қазақстан Республикасының Мем­лекеттік хатшысы – Сыртқы істер министрі Қанат Саудабаев. “Осы бағыттағы ерекше маңыз­ды шара санаулы күннен кейін өткізілетін ЕҚЫҰ-ның Астанадағы Саммиті болуы тиіс. Жоғары дең­гейдегі бұл кездесу кезінде нағыз тарихи шешімдерді жасап шығару бойынша біздің барлық әріп­тес­тері­міздің жемісті жұмысын асыға күтеміз”, – деді Қ.Саудабаев. Төрағалық туралы шешімге қол жеткізу үшін Украинаның қыруар күш-жігер жұмсап, сан кездесулер мен консультациялар өткізгенін атап өткен жөн. Шешімнің Қазақ­стан төрағалық еткен жылда қабыл­данғаны да көрнекті жәйт. Еліміз Украина бастамасын қолдаған ал­ғашқы елдердің бірі болды. Биылғы жылы Іс басындағы төраға Қ.Сау­дабаев Киевке жасаған ресми сапа­ры кезінде баспасөз өкілдеріне жауа­бында Қазақстанның Украи­на­ның төрағалыққа сайлануын толы­ғымен қолдайтынын ашық мәлім­деген болатын. Бұдан кейін, мау­сым айында Украина сыртқы істер министрі Константин Гри­щенко ЕҚЫҰ-ның Венадағы штаб-пәте­ріне сапар жасап, Тұрақ­ты кеңесте өз елінің Ұйымға төр­ағалық ету үмі­ті мен ұстанатын сая­саты ту­ралы мәлімдеме жасаған болатын. Енді, міне, еліміздің стра­тегия­лық әріп­тесі әрі жақын до­сы Ук­раи­на Тәуел­сіз Мемле­кет­тер Дос­­тастығы ішінде ЕҚЫҰ-ға төрағалық ететін екінші мемлекет болып сайланды. Аталған “тыныштық рәсімі” министрлерге іс жүзінде кездеспей, шешім жобасын қарастырып, қа­былдауға мүмкіндік береді. Толық­ты­руы немесе ескертпесі бар ми­нистр оны жазбаша түрде немесе өкілі арқылы Іс басындағы төр­аға­лыққа жеткізеді. Ал белгіленген мер­зім ішінде ешкім қарсылық біл­дірмеген жағдайда шешім күшіне енеді. Биылғы жылы ЕҚЫҰ-ның мемлекет және үкімет басшылары деңгейінде саммиті өтетіндіктен, Ұйым сыртқы істер министрлері ресми мәжіліске жиналмайтын бол­ды. Сондықтан да қажетті шешім­дер осындай “тыныштық рәсімі” арқылы қабылданды”. Еске сала кетейік, нақ осылайша, “тыныш­тық рәсімі” арқылы екіжақты және көп­жақ­ты кеңестердің нәтижесінде тамыз айында ЕҚЫҰ-ға мүше елдер сыртқы істер министрлерінің Аста­на­да 1-2 желтоқсан күні ЕҚЫҰ Сам­митін өткізу туралы шешімі қабылданған болатын. Талғат ЖҰМАҒҰЛОВ, “Егемен Қазақстан” – Венадан.