1 наурызда Қазақстанда алғаш рет аталып өтіп отырған Алғыс айту күніне орай Сенат Төрағасы Қасым-Жомарт Тоқаевтың атына Польша Сенатының төрағасы Станислав Карчевскийдің атынан жолдау келіп түсті, деп хабарлады Қазақстан Республикасы Парламенті Сенатының баспасөз қызметі.
Жолдауда биыл поляк халқының тарихындағы қасіретті оқиға – Қазақстанға жаппай еріксіз көшірілгені кезекті мәрте аталып өтетіні айтылған. 1936 жылы коммунистік қуғын-сүргін салдарынан мыңдаған поляк ауыр қасіретке душар болып, босқындыққа ұшырады. Хатта сталиндік тоталитарлық кезеңде көптеген адам қаза тауып, азапқа ұшырағаны айтылған.
«Біз отандастарымызды және олардың бастан кешкен азабын еске ала отырып, ауыр кезеңде көшіріп әкелінген поляктарды өз бауырындай қабылдаған қазақтарды ізгілікпен еске аламыз», деп жазған С.Карчевский. Осыған байланысты Польша Сенатының Төрағасы Рим Папасы Иоанн Павел II-нің «Сіздердің дәстүрлеріңіздің бір бөлігі ашықтық пен ынтымақ рухынан құралған, өйткені, Қазақстан ежелден көптеген дәстүрлер мен мәдениеттер тоғысқан мекен ретінде көрініп келеді», деген сөзін келтірді.
С.Карчевский сөзінің соңында өткен кезеңде өз отандастарын қолдағандарға және қазіргі таңда олардың ұлттық дәстүрін, тілі мен мәдениетін сақтауға және дамытуға қолдау білдіргендерге алғысын айтты.