Ауылдықтардың бағдарламасы ауқымды

Кеше Қарағанды қаласында «Ауыл» ха­лық­тық-демократиялық патриоттар партиясының өкілдері «Фитохимия» ғылыми-өндірістік холдингі» акционерлік қоғамының ұжымымен кездесті. Жиынға «Ауыл» партиясының төра­ғасы, Парламент Сенатының депутаты Әли Бектаев, партия мүшесі, Парла­мент Мәжілісі депутаттығынан үміт­кер Талғат Зейнуллин, «Ауыл» партия­сының облыстық қоғамдық штабының төрағасы, партияның облыстық филиалы саяси кеңесінің алқа мүшесі Темірболат Мәжитов және тағы басқалар қатысты. «Бүгінгі таңда «Ауыл» партиясының Республикалық қоғамдық штабы барлық қажетті кадрлық, материалдық және қар­жылық ресурстарға ие. Сайлауға лайықты деңгейде қатысуға дайын. Бар­лық аймақтағы штабтар толықтай жаб­дық­талған және жұмысқа қабілетті. Ай­мақ­тағы штаб жетекшілерін және мүше­лерін сайлау науқанының ереже­лері­мен таныстыру жалғасып келеді», – деді кездесуде партия төрағасы Әли Бектаев. Кездесу барысында белгілі бол­ғандай, партияның үгіт-насихат жұ­мыс­тары Қазақстанның барлық аймақтарында қарқынды жүріп жатыр екен. Жалпы үгіт-насихат кезеңінде 110-нан астам іс-шара жоспарланған. Нау­қан басталғаннан бері барлығы 40-тан ас­там іс-шара өтіпті. Республикалық және аймақтық штабта 100-ден астам қызметкер еңбек етуде. Партия өкілдері «Фитохимия» ғы­лыми-өндірістік холдингі» акционерлік қоғамының жабдықтандыру деңгейі, жаңа технологиялары және кәсіпорын қызметкерлерінің жұмыс істеу жағ­дай­лары, өнімнің шығарылуы мен олар­дың отандық және шетелдер нары­ғында іске асырылуымен танысты. «Ауыл» партиясының Қарағанды облыс­тық филиалының төрағасы, «Фито­химия» ғылыми-өндірістік холдингі» АҚ президенті Серғазы Әдекенов кәсіп­орынның бүгінгі тыныс-тірлігі туралы толыққанды әңгімелеп берді. Ол елі­міз­дегі алдыңғы қатардағы ғылыми орта­лықтың бірі. Холдинг базасын­да отандық бәсекеге қабілетті дәрілік препа­рат­тардың 70-тен аса түрін шығаратын Қара­ғанды фармацевтикалық зауыты жұмыс істейді. Кездесу барысында партияның ауыл ша­руашылығына инновациялық техно­логияларды енгізу саясатын басты на­зарда ұстайтын «Ауыл дәстүрін жаң­ғыртамыз!» атты сайлауалды бағдар­ламасы таныстырылды. «Партия аграрлық ғылымның қаржы­лан­дыру көлемін ауыл шаруашылығы жалпы өнімінің 1%-ынан кем түспейтін деңгейге жеткізуді ұсынады. Сондықтан да біз, осындай бастамалар бойынша ғылыми қызметкерлердің ынтасын әрқашан қолдаймыз», – деді «Ауыл» партиясының төрағасы. Қайрат ӘБІЛДИНОВ, «Егемен Қазақстан». ҚАРАҒАНДЫ.