Кеше Қазақстан Республикасының Мемлекеттік хатшысы – Сыртқы істер министрі Қанат Саудабаев Малайзия Сыртқы істер министрі Датук Анифа Аманмен телефон арқылы сөйлесті, деп хабарлады ҚР СІМ-інің баспасөз қызметі.
Әңгімелесуші тараптар, Қазақстан Президенті Нұрсұлтан Назарбаев пен Малайзия Премьер-министрі Наджиб Тун Абдул Разактың ағымдағы жылғы кездесуі қосымша серпіліс береді деп күтіліп отырған Қазақстан мен Малайзия арасындағы ынтымақтастық жағдайы мен болашағын талқыға салды.
Екі ел көшбасшыларының кездесуін жемісті дайындау мақсатында, сонымен қатар, екіжақты ынтымақтастық және халықаралық ұйымдар шеңберіндегі өзара ықпалдастық мәселелерін талқылау үшін тараптар наурыз айының бірінші жартысында Астанада келіссөздер жүргізуге келісті.
Өз кезегінде Д.Аман Қазақстанды ЕҚЫҰ-дағы сәтті аяқталған төрағалығымен құттықтай отырып, Малайзияның алдағы уақытта Қазақстанға Ислам Конференциясы Ұйымының Сыртқы істер министрлері кеңесінің төрағасы ретінде сенім артатынын және осы жауапты миссияны атқаруда Куала-Лумпур тарапынан Астанаға толық қолдау көрсетілетіндігін жеткізді.