«Көне Түркістанның» үлкен мәдениеті

Қожа Ахмет Ясауи кесене­сін­дей ортағасырлық сәулет өнері­нің бір шыңы бар Түркі­стан қаласына соңғы жылдары 1 млн. турист келіпті. Негізінен зия­ратшылар болғанымен, ішінде шетелдік азаматтар да мол. Бүгінде елімізге туристерді көбірек тартудың жолдары іздес­тіріліп жатыр. Оңтүстік Қазақстан облысы әкімдігінің ұйытқы болуымен туризмді дамыту бағдарламасы бойынша «Көне Түркістан» тұжы­рымдамасы әзірленген. ЮНЕСКО бағдарламасына енген Қожа Ахмет Ясауи кесенесі жанында жер асты мешіті, көне монша сияқты тарихи орындар көп. Бүгінде осының бәрі қалпына келтіріліп жатыр. Қала әкімі Әліпбек Өсер­баев­тың айтуынша, кесене төңі­ре­гінде ені 4 метр, биіктігі 6 метр қорған тұрғызылады. Орта­ғасы­р­лық ғимараттар, қорған­ның сырт жағынан көне Рабат қаласы мен Тим базары қайта қал­­пына келтіріледі. Керуен сарай­дағы шайхана мен Шығыс медициналық орталығы, этно­ауыл мен Тұран халықтарының әске­ри мұражайы, шағын көлі бар саябақ та салынбақ. Тари­хи-мәдени этнографиялық орта­лықта мәдениетіміз бен салт-дәстүріміз салтанат құрады. Мұн­да ескі мұ­ра­ны қайта тірілтіп жат­қан қол­өнер­шілер мектебі бар. Олар өз қа­тарына жас жет­кін­шектерді алып, қолөнерге баулып жатыр. Туристер Түркістанға келген­де орта ғасырдағы қалаға келгендей әсерде болу үшін көп жұмыс­тар жасалып жатыр, – дейді қала әкімі. Былтыр саяхатшылар есебі­нен қазынаға 4 млрд. теңгедей қаражат түсіпті. Яғни, табыс­ты молайтуға негіз бар. «Ұлы Жібек жолы» бо­йында орна­ла­сқан Түркістаннан 20 шақы­рым жерде көне Сауран қала­шығы менмұндалайды. Түркі ха­лық­тарының рухани ор­та­лығына арнайы келген шетел­дік туристер еліміздің бай тарих, сәулет өнерінен үлкен әсер алғандықтарын айтады. Бақтияр ТАЙЖАН, «Егемен Қазақстан» Оңтүстік Қазақстан облысы