Екі ірі жол апатынан 27 адам қаза тапты

АСТАНА. 17 мамыр. Перуде екі ірі жол апатынан 27 адам қаза тауып, 40-қа жуығы түрлі деңгейде жарақат алды. Бұл туралы ТАСС ақпарат агенттігіне сілтеме жасаған egemen.kz тілшісі хабарлады. Republica басылымының ақпары бойынша, оның бірі мемлекеттің солтүстік аймағында болған. Жеңіл көлік пен екі жолаушылар автобусы соқтығысты. Сондай-ақ, көліктердің бірі жол жиегіндегі мейрамханалардың біріне кіріп кеткен. Салдарынан 11 адам опат болып, 30-дан астамы зардап шекті. Полиция қызметкерлерінің мәлімдеуінше, жылдамдықты шамадан тыс арттырған автомобиль жүргізушісі жол апатына кінәлі болып отыр. Осындай оқиғаның тағы бірі Перудің солтүстігіндегі Кахамарка қаласында орын алды. Аталған басылымның хабарлауынша, бірнеше адам мінген жүк көлігі құзға құлап кеткен. Болжам бойынша, жүргізуші рульге ие бола алмаған. Салдарынан 16 адам қаза тауып, алтауы жарақат алды. Перу жол апаты жиі болып тұратын елдердің бірі. Ресми мәліметтер бойынша, 2014 жылы бұл мемлекетте 2798 адам жол-көлік оқиғасынан опат болған. Аян Әбдуәли. Дерек: ТАСС. Фото: 24.kz.