Фирманың 5 млн. 400 мың теңгесін ұтқызып, жазаға ұшырады

ҚАРАҒАНДЫ. 17 мамыр. Қарағанды облысының тұрғыны өзі жұмыс істейтін фирманың 5 млн. 400 мың теңгесін букмекерлік кеңседе бәске тігіп жібергені үшін жазаға тартылды. Бұл туралы Қарағанды облыстық соттың баспасөз қызметіне сілтеме жасаған egemen.kz тілшісі хабарлады. Фармацевтикалық өнім сатумен айналысатын қарағандылық жауапкершілігі шектеулі серіктестігінің Жезқазған өңіріндегі өкілі болып жұмыс істеген 28 жастағы ер адам дәріханалардан күнделікті түскен ақшаны букмекерлік кеңселерде бәске тігіп келген. Ұрланған ақшаның сомасы 5 млн. 400 мың теңгеге жеткенде фирма басшылығы оның бұл әрекетін әшкере етіп, құқық қорғау орындарына хабарлаған. Осы оқиға бойынша қылмыстық іс қозғалып, іс сотқа жіберілді. Жезқазған қалалық соты айыпталушының ұрланған ақшаны иесіне қайтарып бергендігін және асырауында үш баласы мен кәрі анасы барын ескеріп, жеті жылға шартты түрде бас бостандығынан айырды. Қайрат Әбілдинов. Дерек: Қарағанды облыстық соттың баспасөз қызметі. Фото: capital.kz.