Еліміздің әлеуеті таныстырылған сапар

Германияның Еуропадағы қауіпсіздік және ынты­мақтастық ұйымындағы (EҚЫҰ) төрағалығы аясында жақында Берлинде өткен «Сауда мен инвестициялардың өзара байланыстылығы» («Connectivity for Commerce and Investment») халықаралық конференциясына Қазақстан Сыртқы істер министрінің орынбасары Роман Василенко бастаған делегация қатысты. Делегацияның құрамына Қазақстан Республикасының ЕҚЫҰ-дағы Тұрақты өкілі Қай­рат Сарыбай, Қазақстанның Германиядағы елшісі Болат Нүсіпов, тиісті министрліктер мен ведомстволардың, сондай-ақ, ұлт­тық компаниялардың өкілдері енді. «Еуразия кеңістігінде эконо­микалық өзара әрекет­тестікті нығайту» тақырыбындағы плен­ар­лық сессияда Р.Василенко сөз сөйлеп, конференцияға қаты­сушыларды Еуразия құрлы­ғының кіндігіне орналасқан еліміздің географиялық орнының артықшылықтарын барынша толық және тиімді пайдалануға бағытталған саясатының басты басымдықтарымен таныстырды. Конференцияға қатысу­шы­лар үшін «Нұрлы Жол» инфрақұрылымдық даму бағ­дарламасы, «Батыс Еуропа – Батыс Қытай» автокөлік жолы­ның құрылысы, «Қорғас» шекара маңы ынтымақтастығы халық­аралық орталығын дамыту жоспарлары, Ақтау теңіз порты мен Транскаспий логистикалық бағыттары үлкен қызығушылық тудырды. Конференцияға қатысу­шы­ларға, сондай-ақ, Жібек жолының экономикалық белдеуі мен Еур­а­зиялық экономикалық одақты (ЕАЭО) қоса алғанда Еуразия­дағы түрлі интеграциялық бастама­лар мен инфрақұрылымдық даму бағдарламаларының өзара тиім­ділігін көрсететін жоба-жос­парлар таныстырылды. Осы орай­да, өзара тиімді экономикалық ынтымақтастықтың келешегін анықтау мақсатында ЕАЭО және Еуропалық одақ арасындағы үнқатысуды жолға қою туралы ЕАЭО төрағасы ретіндегі Қазақ­стан Президенті Нұрсұлтан Назарбаевтың бұрын жарияланған бастамасының маңыздылығы ерекше аталды. Конференцияның мақсаты Ванкуверден Владивосток­қа дейінгі экономикалық бай­ланыстарды нығайту мүдде­л­ері үшін сауда және инвес­тициялық жағдайларды жақсарту мүмкіндіктерін іздестіру болды. ЕҚЫҰ-ның екінші өлшемі шеңберінде ұйымдастырылған бұл іс-шараға ЕҚЫҰ кеңістігі түрлі аумақтарының саяси-экономикалық және азаматтық қоғамның жетекші өкілдері қатысты. Үстіміздегі жылы ЕҚЫҰ-да Германия төрағалық етеді. Бүгінде Берлин «Үнқа­тысуды жаңғырту, сенімді жаңа­дан қа­лыптастыру, қауіпсіздікті қалпына келтіру» ұранымен федералдық үкімет өзекті тақы­рыптардың мейлінше мол саны бойынша үнқатысуды ілгерілету, ЕҚЫҰ кеңістігінде ұзақ мерзімді негіздегі сенімді қалпына келтіру үшін ЕҚЫҰ институттары мен құралдарын нығайтуға ықпал етуге ниетті екенін анық білдіріп отыр. Берлинде болуы кезінде Р.Василенко ГФР СІМ-інің Шығыс Еуропа, Кавказ және Орталық Азия елдерімен ынты­мақтастық мәселелері бо­йынша уәкілі Андреас Пеш­кемен, Қазақстан-Германия Стратегиялық ынтымақтастығы бойынша іскерлік кеңесінің тең төрағасы Петер Тильспен және Германияның Шығыс экономика комитетінің аймақтық директоры Мартин Хофманмен кездесіп, келіссөздер жүргізді. Сұхбаттастар екіжақты қарым-қатынастарды дамыту мен халық­аралық күн тәртібінің өзекті мәселелерімен қатар, екі мемлекеттің шикізат пен техно­логиялық серіктестігі шеңберінде экономикалық келісімдерді жүзеге асыру бойынша табысты өзара әрекеттестігі, Астанада өкізілетін  ЭКСПО-2017 көрмесіне Германияның қатысуы, сондай-ақ, Қазақстанда қосарланған білім беруде неміс үлгісін енгізу мәселелерін талқылады. Қазақстандық дипломат, сонымен қатар, Австрия Сыртқы істер министрлігінің Бас хатшысы Михаэль Линхартпен кездесті. Кездесуде екіжақты күн тәртібінің өзекті мәселелері мен Австрияның алдағы 2017 жылы ЕҚЫҰ-да төрағалық етуіне қатысты жайттар талқыланды. Австрия төрағалығының «Жасыл экономиканы құру, серіктес­тікті жасау» (Greening the Economies, Building Partnerships) бойынша ұсынған ұраны Қазақстанның сыртқы саяси басымдықтары мен алдағы ЭКСПО-2017 халық­аралық мамандандырыл­­ған көрмесінің тұжырымдамасымен аса үндес екені атап көрсетілді. Осыған орай, сұхбаттастар келесі жылы екі мемлекеттің күш-жігерін ЭКСПО-2017 алаңында біріктіру туралы уағдаластыққа келді. «Егемен-ақпарат»