Құнды жәдігерлерден құралған қор

Жуырда елордадағы Тұңғыш Президент музейінде Қазақстан халқының бірлігі күніне арналған «Күнделікті өмірдің бейнелері» атты тақырыпта қор көрмесінің ашылу салтанаты өтті. «Музей жинағы» атты жаңа музейтану бағдарламасы алғаш рет әлем халықтарының күнделікті тұрмыстық мәдениетінің маңызды тұстарын көрсететін тақырыптық интерьер топтамасына жүйеленген музей жинақтарының шағын бөлігін ұсынды. Көрмені музей директорының орынбасары Күлайша Ақтаева ашып, Елбасы кітапханасының атқарушы директоры Бейсембай Жұмабеков музей тарихына, он­дағы жәдігерлердің құндылығына тоқталды. Айта кетейік, музей жинақта­рының ерекшелігі – Қазақстан Респуб­ликасының Президенті Н.Ә.Назарбаевқа, Қазақ еліне, қазақ халқына, әлемдегі өзара ық­палдастық пен тату көр­шілік­ті дамытуға бағытталған Қазақ­станның халықаралық деңгейдегі белсенді іс-әрекетіне деген зор құрметтің белгісі ретінде табыс етілген сыйлықтардан құрал­ған. Топтамалар мен жеке жәдігер­лердің тұсаукесері музей қызмет­керлерінің жүйеленген тұрақты жұмыстарының нәтижесі ретінде «Музей жинағы» бағдар­ламасының маңызды бағыттарының бірін құрайды. Әлем халықтарының алуан түрлі шығармашылығы мен жоғары көркем мәдениетінің үл­гілерінен іріктеліп алынған қай­таланбас бірегей жиынтық өз тарихынан көптеген ақпарат береді. Музейдің үш залында орна­ласқан «Күнделікті өмірдің бей­нелері» көрмесінің экспозициясы классикалық музейлік сахналық көріністерден және санамызда күнделікті өмірдегі әсемдіктің сим­волы ретінде қалыптасқан жеке заттардан құралған. Көрме 2016 жылдың 26 маусымына дейін жал­ғасатын болады. Раушан ТӘУІРХАНҚЫЗЫ, «Егемен Қазақстан» Суретті түсірген Ерлан ОМАРОВ