Мәдениет және спорт министрі Бейбіт Шүменовті құттықтады

АСТАНА. 23 мамыр. Мәдениет және спорт министрі Арыстанбек Мұхамедиұлы кәсіпқой бокста WBA тұжырымы бойынша бірінші ауыр салмақта әлем чемпионы атанған отандасымыз Бейбіт Шүменовті құттықтады. Бұл туралы министрлік баспасөз қызметінің дерегіне сүйенген egemen.kz тілшісі хабарлады. «Сізді жарқын жеңісіңізбен шын жүректен құттықтаймын! Бұл жолы тағы бір мәрте Қазақстанның атын әлемге таныттыңыз. Сіз жартылай ауыр салмақта әлем чемпионысыз. Енді оған WBA тұжырымы бойынша бірінші ауыр салмақтағы әлем чемпионының белдігін де жеңіп алдыңыз. Қазақстан боксшылары арасында алғашқы болып екі салмақ дәрежесінде чемпион атанып отырсыз. Бұл еліміз үшін үлкен мәртебе. Деніңізге саулық, отбасыңызға амандық тілей отырып, еліміздің көк байрағын асқақтатып, жеңісті жолыңыздың жалғаса беруіне тілектеспін», делінген министрдің құттықтау хатында. Дастан Кенжалин. Дерек, фото: Мәдениет және спорт министрлігінің баспасөз қызметі.