Ас берудегі аста-төктік бұдан былай тежелуге тиіс

Қазақстан мұсылмандары діни басқармасы қазақстандық­тар­ды құдайы ас беруде ысырапшылық жасамауға шақырып отыр. Мұның жайын Бас мүфти Ержан қажы Малғажыұлы тарқатып айтып берді. «Құдайы ас берудің де өзіндік бір әдебі мен тәртібі бар емес пе? Қай жағынан келгенде де, шектен тыс шығынға батып, ысырап етуге болмайды. Мұны біздің асыл дініміз де құптамайды. Біз еліміз бойынша баршаға тиімді болатын құдайы астың ортақ мәзірін әзірлеп, көпшілікке ұсындық. Бұл бастамаға ел ағалары, ақсақалдар, зиялы қауым өкілдері, мешіт жамағаты үлкен қолдау көрсетуде. Айталық, Павлодар облысындағы орталық мешіттің асханасында осы ас мәзірі бойынша құдайы ас беріліп келеді. Жергілікті жамағат игі бастама үшін алғысын білдіріп, ізгі тілектерін жеткізуде. Қолға алған жұмысымыз өзге де облыстарда жүзеге асады деген ойдамыз», – деді ол. Қазақстан мұсылмандары діни басқармасының Павлодар облысы бойынша өкіл имамы Нариман Исеновтің пікірінше, мешітке ке­луші жергілікті жамағат арасында: «Несие алып, құдайы ас берсем бола ма?» – деп сұрап келетіндер де бар. «Бұл – дінімізде құпталмайтын амал. Ал біз ұсынған жаңа ас мәзірі асқа кететін шығынды екі есеге азайтады», – дейді ол. Қазіргі күндері Ғұламалар кеңе­сінде талқыланып жатқан «Жа­наза» кітабында: «Қайтыс болған кісінің атынан ас беру – мұсылман шариғатында міндетті түрде атқа­рылуы тиіс парыз амалдарына жатпайды. Яғни, жасалмаған жағ­дайда ешбір адам күнәһар болмайды. Жалпы алғанда, жұртқа тамақ таратудың сауапты іс екенін хадистер мен Құранның кейбір аяттарынан байқаймыз. Дінімізде міндетті түрде қарызданып немесе өзіңе қажетті қаржыңды жұмсап, қайтыс болған кісі атынан үлкен мал сойып, садақа бер деген үкім жоқ. Садақалар, құдайы астар берілген жағдайда ысырапқа жол берілместен атқарылуы тиіс», – деп атап көрсетілген екен. Айта кететін жайт, елімізде құдайы ас, садақа беру, мазар салу, жер­леу секілді рәсімдерді бір ізге, бір жүйеге келтіру мақсатында әзірленіп жатқан «Жаназа» кітабы Ғұламалар кеңесінің араласуымен жуырда жарыққа шықпақ. Мұрат АЙТҚОЖА