Ғұмырғасыр

Бүгінде 100 жастың табалдырығынан аттаған сахна саңлағы Айша Абдуллина апамыз 27 жасында «Еңлік-Кебекте» Еңліктің рөлін сомдап, Қазақ КСР-інің халық әртісі атанған екен. Алматыдан Шымкентке қоныс аударғаннан бері Ж.Шанин атындағы облыстық қазақ драма театрында үзіліссіз 64 жыл еңбек еткен актрисаның шығармашылық кеші «Ғасырға ұласқан ғұмыр» деп аталды. Мерейтойға жиналған көп­шілік жүз жасаған, осы саналы ғұмырында қазақ сахнасындағы талай ғажайып тұлғалардың образдарын ашып, үлкен мәдени мұра қалдырған халық әртісін ақбозатқа жеккен пәуескеден алқалап түсіріп алды. Мерейтой «Оңтүстік фильм» киностудиясы арнайы түсірген деректі фильммен ашылды. Облыс әкімі Бейбіт Атам­құлов атақты әртісті арнайы қабылдап, 100 жасқа толған мерейтойының лайықты аталып өтетіндігін айтқан болатын. Уақытында театрдан бөлек, «Қан мен тер», «Сұржекей» сияқ­­ты кинофильмдерде өзінің қолтаңбасын қалдырған Айша Абдуллинаның мерейтойы құр­метіне бір апта бойы театр ап­­талығы өткен-ді. Әртіс – көрермендерімен ба­қытты. Қа­зақтың әдебиет, театр өнерін­дегі дарабоздарымен қоян-қол­тық жұмыс жасаған Айша апай жұртының меймілдеген ықыласына рахметін айтты. Апай сахнаға көтерілгенде көпшілік «Гәкку» әнін қосылып айтып, тік тұрып ұзақ қол шапа­лақтап қошемет көрсетті. Облыс әкімінің орынбасары Ұласбек Сәдібеков облыс әкі­мі Бейбіт Атамқұловтың құт­­тықтауын оқып, сыйлығын тап­сырды. Театрда өткен кеште Мә­дениет және спорт министрі А.Мұхамедиұлының құттықтау хаты оқылды. – Сахна– ар мен жан тазалығы арқылы бізді Жаратқанға бір саты жақындататын құтты мекен. Бұл жерде еңбек етіп жүрген әртістің тамған тері қасиетті, – деп сөз сабақтаған Қазақстанның халық әртісі, республикалық Театр қайраткерлері ода­ғы­ның төрағасы Тұңғышбай Жа­манқұлов қара шаңырақ М.Әуезов атындағы Қазақ мем­лекеттік академиялық драма театры ұжымының жүрекжарды сөзін жеткізді. Даңқы алты алашқа тара­ған атақты актрисаны арна­йы құттықтауға көрші Қырғыз­стан­нан да өнер ұжымы келіпті. Өмірін өнерімен өрнектеген, жүз жасқа толса да ұлы сахна алдындағы адалдығын жоғалт­паған, киесіне тәу еткен Айша Абдуллинаның актрисалық тағы­лымы осылай өрілді. Бақтияр ТАЙЖАН, «Егемен Қазақстан» Оңтүстік Қазақстан облысы