Табиғатты ластаған

кәсіпорын 4 миллиард 56 миллион теңге өтемақы төлейді Бір ай бұрын «Қазцинк» компаниясына қарасты Талов қалдық қоймасында апат орын алғаны белгілі. Шығыс Қазақстан облыстық табиғат қорғау прокуратурасы қазір Риддер кен-байыту комбинаты қызметіндегі экологиялық заң талаптарының сақталуын тексеруде. Еске сала кетейік, қалдық қоймасында 22 мамырда айналымдағы суды шығару жүйесі құрылғысының бір жағы опырылып, нәтижесінде қоймадан аққан төгінді су Филипповка өзеніне құйылған болатын. Судың төгілуі 22 мамырдағы сағат 09:30-дан 25 мамырдағы сағат 14.00-ге дейін орын алған. Риддер кен-байыту комбинаты маркшейдер бөлімінің есебіне сәйкес, қоймадан аққан судың көлемі 394 452 текше метрді құрады. Апат болған күндері облыстық экология департаментінің мамандары өзеннен бірнеше сынақ алды. Алынған сынақты талдау нәтижесінде су құрамында бір­қатар ластану зат тектерінің бар еке­ні анықталды. Осыған орай табиғат қорғау прокуратурасы департаментке «Қазцинк» ЖШС-тен қоршаған ортаға келтірілген залалды өндіру және апаттың себебін анықтау, заң бұзу­шылықтарды жою туралы ұсыныс енгізді. Департамент қоршаған ортаға келтірілген шығынды есептеп, оның сомасы 4 056 237 772 теңге құрағанын анықтады. Облыстық табиғат қорғау прокуроры Бақытжан Ізғұтдиновтің айтуынша, компания аталған қаржыны бір айдың ішінде бюджетке ерікті түрде құюы қажет. Думан АНАШ, «Егемен Қазақстан» ӨСКЕМЕН