• 23 Маусым, 2016

Ынтымақтастық ауқымы кең

274 рет

көрсетілді

2 мин

оқу үшін

Egemen Qazaqstan

Бүкіләлемдік туристік ұйым ЭКСПО-2017 көрмесі аясында 2017 жылдың маусым айының соңына таман «Туризм және Болашақ энергиясы» атты бірлескен конференция өткізуді жоспарлап отыр. Форум Бүкіләлемдік туристік ұйымға мүше 150-ден астам мемлекеттің туризм министрлерінің қатысуымен ұйымдастырылмақ. Бұл жөнінде Мадридте өткен «Астана ЭКСПО-2017» ұлттық компаниясы мен Бүкіләлемдік туристік ұйым (БТҰ) арасындағы ынтымақтастық туралы меморандумға қол қою рәсімі кезінде белгілі болды. Құжатқа «Астана ЭКСПО-2017» ҰК» акционерлік қоғамының басқарма төрағасы Ахметжан Есімов пен БТҰ Бас хатшысы Талеб Рифаи қол қойды. «Көрме аясында өткізгелі отырған бұл форум Қазақстандағы туризмнің тұрақты дамуы үшін тиімді алаң болады деп санаймыз. Өйткені, «Астана ЭКСПО-2017» келесі жылы өтетін әлемдегі ең ауқымды халықаралық іс-шаралардың бірі, ал БТҰ – туризм саласындағы алдыңғы қатардағы ұйым», – деді Ахметжан Есімов. Меморандум шарттары бойынша Ұлттық компанияның Бүкіләлемдік туристік ұйымның «Жібек жолы» бағдарламасы бойынша жұмыс тобының отырыстарына қатысуы, сондай-ақ, Көрмеге жолнұсқаушылар (гид) даярлау және туроператорларға арналған тренингтер өткізу мәселелері қарастырылған. «Қол қойылған меморандум біздің ұйымдар арасындағы екіжақты ынтымақтастықты жаңа бір деңгейге шығарып, Қазақстанның туристік бренд ретінде ілгерілеуіне мейлінше ықпал етеді деп үміттенемін», – деп атап өтті Талеб Рифаи отырыста сөйлеген сөзінде. Өткен аптада Мадрид сапары барысында Ахметжан Есімов басқарған делегация «ТУРИСПАНИЯ» ұйымымен сәтті келісім жүргізген болатын. Екі жақ ірі халықаралық іс-шаралар кезінде шетелдік туристерді тарту мен қабылдау мәселесін талқылап, сондай-ақ, Қазақстандағы туристік бағыттарды ілгерілету бойынша келісімді жалғастыратындығын айтты. Сонымен бірге, Парижде өткен Халықаралық Көрмелер бюросының (ХКБ) Бас Ассамблеясының 159-сессиясында «Астана ЭКСПО-2017» делегациясының есепті баяндамасы тыңдалды. Осы баяндамада келесі жылдан бастап Қазақстан бір жақты тәртіп негізінде басым көпшілігі Еуроодаққа кіретін, Экономикалық ынтымақтастық пен даму ұйымына мүше Монако, Малайзия, Сингапур және басқа да 35 мемлекеттерді визалық режімнен босататындығы атап көрсетілді. Бұл шешім Қазақстандағы халықаралық іс-шараларға, әсіресе, Астанадағы ЭКСПО-2017 халықаралық мамандандырылған көрмесіне шетелдік туристердің көптеп келуіне игі ықпал ететін болады. Ұлан САНЖАР