Кеше Байланыс және ақпарат қызметкерлері күні қарсаңында «Нұр Отан» партиясының Орталық аппаратында журналистер арасындағы дәстүрлі «Нұр Сұңқар» республикалық байқауының жеңімпаздарын марапаттау салтанаты болып өтті.
Парламент Мәжілісінің депутаты Қуаныш Сұлтанов төрағалық еткен арнайы құрылған комиссия бір ай көлемінде байқауға түрлі жанрдағы, атап айтқанда, очерк, сұхбат, мақала, телевизиялық және радиобағдарламалар, журналистік зерттеу, сондай-ақ, жарияланымдар мен бағдарламалар циклы бойынша материалдар қабылдады. Комиссия құрамына еліміздің бұқаралық ақпарат құралдарының ең беделді өкілдері кірген.
Байқауға қатысу үшін журналистердің Елбасы, «Нұр Отан» партиясының Төрағасы Н.Ә.Назарбаевтың алдыға қойған міндеттері мен тапсырмаларының жүзеге асу барысына, «Қазақстан-2050» Стратегиясының басымдықтарына, «Нұр Отан» партиясы Доктринасының қағидаларына және партия бастамаларына арналған жұмыстары қабылданды.
Сөйтіп, «Нұр Сұңқар» байқауына республикалық және аймақтық бұқаралық ақпарат құралдарынан 230-дан астам өтініш келіп түсті. Олардың ішінен 83 жұмыс іріктеуден өтті.
Қорытынды кезең бойынша, «Әлем. ХХІ ғасыр» манифесін жүзеге асыруға қосқан үлесі үшін» аталымы бойынша сыйлыққа «Казахстанская правда» республикалық газеті» АҚ басқарма төрағасының орынбасары Татьяна Костина ие болды.
«Нұр Отан» партиясының жұмысы жөніндегі ең үздік материалға арналған сыйлық «24.kz» телеарнасындағы «Сұхбат» бағдарламасының авторы және жүргізушісі Ерлан Игісіновке берілді.
Үздік телевизиялық журналистерге берілетін «Ерекше пікір» аталымына бірден екі үміткер лайық деп танылды. Олар – «Хабар» агенттігі сараптамалық бағдарламалар бөлімінің тілшісі Айгүл Әділова мен «Қазақстан» телеарнасының арнаулы тілшісі Әлімжан Исабай.
«Сөз шебері» аталымы бойынша үздік журналист ретінде «Айқын» газетінің редакторы Бейсен Тәжібаев жеңімпаз атанды. «Қоғам үні» аталымында үздік радиожурналист атағы «Орда FM» радиосының дикторы Ерлан Сисеновке берілді.
«Аймақ айнасы» аталымы бойынша жеңіс «Егемен Қазақстан» газетінің Жамбыл облысындағы меншікті тілшісі Оралхан Дәуітовке бұйырды. «Шымкент келбеті», «Оңтүстік Қазақстан», республикалық «Түркістан», «Жас Алаш» газеттерінде жұмыс істеген Оралхан Дәуітовтің журналистика саласында еңбек етіп келе жатқанына жиырма жылдың жүзі болды. Осы уақыт ішінде қаламы жүйрік әріптесіміз талай мәселе көтеріп, тұщымды дүниелерімен оқырманды тәнті етті. Бірнеше жылдан бері «Егемен Қазақстан» газетінде жемісті еңбек етіп келеді.
Ақпарат агенттігінің үздік журналисіне берілетін «Медиа-профи» аталымына NUR.kz сайтының тілшісі Юлия Абрамова лайық деп танылды. «Көзқарас» аталымы бойынша үздік блогерлер ретінде Шолпан Әли мен Қанат Әуесбай жеңіске жетті.
Жеңімпаз жүлдегерлерге 500 мың мен 1 миллион теңгеден ақшалай сыйлық табыс етілді. «Нұр Сұңқар» – партия мен БАҚ өкілдері арасындағы әріптестікті және ынтымақтастықты дамытуды көздейтін Қазақстанның барлық журналисіне арналған дәстүрлі ашық байқау.
Раушан ТӘУІРХАНҚЫЗЫ,
Журналист
