«Былғары доп» қарағандылық балақайларға бұйырды

Биылғы «Coca-Cola Былғары Доп» балалар-жасөспірімдер турнирі қазақ футболының отаны саналатын Семей қаласында өтті. Турнирдің балдырған ба­ла­ларға арналған ойындары Семейдегі «Турист» және «Це­ментник» спорттық нысан алаң­дарында, ал финалдық жек­пе-жек «Спартак» стадионында ұйымдастырылды. Осы жолы «Coca-Cola Был­ғары Доп» турнирінің бас жүлдесін Қарағанды және Атырау облыстарының балғын футболшылары финалдық кездесуде өзара сарапқа салды. Тартысты өткен ойынның негізгі уақыты 1:1 есебімен тең аяқталды. Ал кездесуден кейінгі жеңімпазды анықтаған пенальти сериясының нәтижесінде қарағандылық жас футболшылардың бағы жанды. Қорытынды есеп – 6:5. Жарыстың марапаттау рәсі­міне еліміздің танымал футболшысы, өзінің спорттық мансабын Семейдің «Елім-ай» командасында бастаған, Еуропа чемпионатының іріктеу ойындары аясында Қазақстан құра­масының алғашқы голын соққан Андрей Карпович қатысты. Жалпы бұл турнирге жыл са­йы­н еліміздегі 6200 мектептің 400 мыңнан астам оқушысы қатысады. Өзінің он жылдық тари­хында «Coca-Cola Былғары Доп» жарысында жасыл алаң үстін­де бір миллионнан аса бала доп теуіпті. Қайрат ӘБІЛДИНОВ, «Егемен Қазақстан» ҚАРАҒАНДЫ