«Жұмыртқадан жүн қырқу» деп осыны айт

Құс шаруашылығы халықты мейілінше қысқа мерзім ара­лығын­да азық-түлік өнімімен қамтамасыз етуге қабілетті бірден-бір сала болып табылады. Оған жұмыртқа өндірумен айналысатын құс шаруашылығын мысал ретінде келтірсе де жетіп жатыр. Осы саладағы өндірістің өсуі арқасында бүгінде ел тұрғындарын жұмыртқамен 100 пайыз қамтамасыз етуге қол жеткізіліп отыр. Мәселен, өткен 2015 жылы 4,7 миллиард данадан астам жұмыртқа өндірілген. Құс фабрикалары мәлі­мет­теріне негізделген болжам бо­йынша, 2016 жылы жалпы жұмырт­қа өндірісі 5 миллиард данаға дейін жетпек. Осындай оң өзгерістерге қара­мастан, Қазақстанның Құс өсіру­шілер одағы келтірген дәйектерге сүйенер болсақ, құс шаруашылығы саласында проблемалар да жоқ емес. Солардың бірі де бірегейі жұ­мырт­­қаның бөлшек саудада­ғы (дү­кен­­дердегі) соңғы құнына бай­­ла­ныс­ты туындап отыр. «Құс өсіру­­ші­лер одағы» заңды және же­ке тұл­ғалар бірлестігінің прези­ден­ті Руслан Исмаилұлы Шарипов­тың ай­туын­ша, жыл ішінде жұ­мырт­­қаның көтерме сауда­дағы баға­сы 4-5 ретке дейін өзге­ріп тұра­тын көрінеді. Айталық, қазір­гі уа­қыт­та құс фабрикалары өз өнім­дерін орта есеппен 17-18 теңгеден бер­се, супер­маркеттерде сатылған сәт­те ол баға бір жарым-екі есеге де­йін қым­баттап шығады екен. Осы­­лай­ша, 1-категориялы бір жұ­мырт­­қа­ның бағасы 31-35 теңгеге де­йін жетіп жығылады. Ал делдал­дар болса осының арқасында 200 па­­йыз­ға дейін пайда түсіріп отыра­ды. Құс өсірушілер одағының ма­ман­­дары Астана қаласындағы су­пер­­мар­кеттер бойынша мониторинг жүр­гізген кезде орта есеппен бір лоток (30 дана) жұмыртқаның баға­сы мың теңгеге дейін жететінін анықтаған. Осыдан келіп неліктен құс фаб­­ри­­ка­лары босатқан азықтық жұ­мырт­­қа бөлшек саудадағы баға­дан бір­неше есе арзан деген сауал туындайды. Осындай жағдайларды ескере келіп, ауылшаруашылық өнімдері бағасының тартымдылығын қамта­ма­сыз ету мақсатында Қазақ­стан­­ның Құс өсірушілер одағы әлеу­­меттік маңызы бар өнім­дер санаты­на жататын тамақ өнім­дерін сату кезінде құс өсіретін кәсіп­орындар өнімдерінің босатылу бағасына 20-35 пайыз үстеме қосуды ұсы­нып отыр. Олардың ойынша бұл отан­дық өнімге деген сатып алушы­лық сұранысты қамтамасыз етпек. Несі бар, келісуге болатын ұсыныс. Сейфолла ШАЙЫНҒАЗЫ, «Егемен Қазақстан»