Болашаққа Елбасымен бірге

Ақтөбе қаласында «Нұр Отан» ХДП Жоғары партия мектебі пар­тияның облыстық филиалымен бірлесіп, елдің батыс өңірлері бастауыш пар­тия ұйымдарының төрағалары үшін оқыту семинары аясында «2010-2014 жылдарға арналған үдемелі ин­дустриялық-инновациялық даму мем­лекеттік бағдарламасын жүзеге асыру жағдайында инновациялар мен өн­ді­ріс­тің ықпалдасу басымдықтары» та­қы­рыбында дөңгелек үстел өткізді. Оған Қазақстан Республикасы Парламенті Мәжілісінің депутаттары, Мемлекеттік органдар бизнес қоғамдас­тықтары өкілдері, отандық және шетелдік ғалым сарапшылар қатысты. «Нұр Отан» ХДП-ның кезекті ХІІІ съезінен кейін іле-шала ұйымдас­ты­рылған шара барысында бүгінгі күн­нің бірқатар маңызды мәселелері сөз болды. Өңірдегі «Қазмұнайбұрғылау», «Қаз­трансойл» және «МАЭК Қаза­томпром» жауапкершілігі шектеулі серіктестіктері сияқты ірі кәсіп­орын­дардың бастауыш партия ұйым­дары­ның басшылары да осы семинар тың­даушылары болды. Дөңгелек үстелге қатысушылар алдында Жо­ғары партия мектебінің директоры, экономика ғылымдарының докторы Бақыт Есекина кіріспе сөз сөйлеп, жоғары партия мектебінің құрылымдық жүйесі­мен, атқаратын жұмыстарымен қыс­қаша таныстырып өтті. Ол бұл шара­ның Елбасы Нұрсұлтан Назарбаевтың «Болашақтың іргесін бірге қалаймыз» атты Қазақстан халқына Жолдауын және 2010-2014 жылдарға арналған үдемелі индустриялық-инновациялық даму бағдарламасын, сондай-ақ «Нұр Отан» ХДП ХІІІ съезінде Елбасы алға қойған міндеттемелерді ақпараттық қолдау және халық арасында түсін­діру бойынша «Нұр Отан» ХДП-ның жоспарлы жұмысы аясында өткізіліп отырғанын атап өтті. Дөңгелек үстел­дің мақсаты Жолдау мен съезде атап көрсетілген негізгі міндеттер мен ин­дустриялық-инновациялық даму бағ­дарламасын, әлеуметтік даму және жұ­мыссыздықты жою басымдық­та­рын, инновация мен өндірістің ық­пал­дас­­тығын қамтамасыз ету мәселе­лерін өзара талқылау, сондай-ақ, инно­вацияны өн­діріске енгізу үдерісін жеделдету жол­дарын анықтайтын ұсыныстар дайын­дау болып табылады. – Қазірдің өзінде жұмыс тобы бір­қатар ұсыныстарды дайындап үлгерді. Дөңгелек үстелде оларды талқылап, Үкі­метке, Парламентке жолдаймыз. Инно­вацияны өндіріске енгізуді қолдау мақ­сатында аймақтарда инновациялық кластерлер құруды, инновациялық орта­лық­тар ашуды ұсынып отырмыз. Өкінішке қарай, жергілікті жерге ұлт­тық иннова­циялық жүйенің қандай мүмкін­діктері бар екені туралы ақ­параттар толық жетпейді. Бизнес құры­лымдары тапсырысты қалай беру керектігін, венчерлік қордың не екенін, инновацияны өндіріске енгізуге ғы­лыми мүмкіндікті қалай тиімді пай­далануды, салықтық жеңілдіктерді, салық каникулы дегеннің не екенін біле бермейді. Сондай-ақ, өндіріске инновацияны енгізудің эконо­ми­калық тиімді тетіктері мен механизмдерін де ұсынып отырмыз. Ең бастысы, біз әрбір қазақстандықтың үдемелі ин­дус­триялық-инновациялық бағ­дар­ла­ма­ны жүзеге асыруға қатысуына ық­пал ету­ге жағдай жасаймыз, – дейді Б.Есекина. Мемлекеттік бағдарламаны жүзеге асырудың басты тетіктерінің бірі ғылым мен өндірістің тиімді ықпал­дасуы болып табылады, ол еліміздің ұлттық инновациялық жүйесін қалы­п­тастыруға мүмкіндік береді. Дөңгелек үстелде «Қазақстан ин­дустриялық даму институты» АҚ вице-президенті Галина Мүсенова 2010 жылы үдемелі индустриялық-инно­вациялық даму бағдарламасын жүзеге асырудың аспектілері жайында, «Ұлт­тық иннова­циялық қор» АҚ-тың бас­қарушы директоры – талдау ор­талы­ғының ди­ректоры Жұматай Сәлімов инновация­ларды өндіріске енгізу са­ласындағы мемлекеттік саясат туралы баяндады. Осы шарада сөз алған облыс әкімі­нің орынбасары Роза Кемалова атал­мыш мемлекеттік бағдарлама аясында Ақтөбе облысы бойынша 2014 жылға дейін 1 трлн. теңге тұратын 86 инвес­тициялық жоба іске асырылатынын, 16 мың жаңа жұмыс орны ашылаты­нын жеткізді. Оның айтуынша, бүгін­гі күні еліміздің индустрияландыру картасы­на облысымыздан құны 450,2 миллиард теңгені құратын 33 жоба кіреді. Оның 12-сі республикалық, 21-і өңір­лік кар­таға жатады. 2010 жылы қарас­тырыл­ған 24 жобаның іске қосылуы нәти­же­сінде 109,8 миллиард теңге инвестиция игеріліп, 5,4 мың жұмыс орны ашылды.   Мемлекеттік бағдар­ла­маның басты ба­ғыттарының бірі ірі кәсіпорындар­дың тауар мен қызмет­терді сатып алу­дағы қазақ­стандық үлесін жоғарылату болып табылады. Атқарылған жұмыс­тардың қорытын­ды­сы бойынша жүйе­лік ком­пания­лардың 32,8 миллиард тең­гелік сатып алуларының 65,2 пайы­зы немесе 21,4 миллиард теңгесі жергілікті тауар өндірушілердің үлесіне тиген. Ал партия съезінде Елбасы алдағы 10 жылдыққа арналған бағдар­лама­лық сөз сөйледі. Қатысушылар Президентті алдағы сайлауға үміткер ретінде ұсынды. Біздер, деді дөңгелек үстелге жиналғандар, Мемлекет бас­шысы алға қойған мақсат-міндеттерін жүзеге асыруы үшін президенттік сайлауда оны қолдап дауыс беретін боламыз. Сатыбалды СӘУІРБАЙ. Ақтөбе облысы.