«Егемен» мен «Қазақстан» бірлескен жобаларды жүзеге асырады

Бүгін еліміздегі ең ірі екі ақпарат құралы – «Егемен Қазақстан» газеті мен «Қазақстан» телерадиокорпорациясы арасында өзара ынтымақтастық туралы меморандум бекітілді. Бас басылымның ғимаратында өткен кездесу барысында осы құжатқа «Егемен Қазақстан» республикалық газеті» АҚ басқарма төрағасы Дархан Қыдырәлі және «Қазақстан» РТРК» АҚ басқарма төрағасы Нұржан Мұхамеджанова қол қойды. Бұл меморандум қазақ баспасөзінің қара шаңырағына айналған, 100 жылға жуық тарихы бар газет пен қабырғалы қалың елдің сүйікті телеарнасына бірлескен жобаларды жүзеге асыру, отандық ақпарат кеңістігінде сапалы өнімдер ұсыну және шығармашылық үдерістерде өзара қолдау көрсету тұрғысынан тиімді ынтымақтастыққа жол ашады. Кездесу барысында Нұржан Жалауқызы атап өткендей, қазіргі заманда отандық ақпарат құралдарына жаңа талаптар мен міндеттер қойылып отыр. Өйткені, баспасөз қалың жұртшылыққа сапалы, бәсекеге қабілетті өнім ұсынуы тиіс. Сондықтан болашақта осы меморандум негізінде көптеген маңызды жобаларды бірлесіп іске асыру жоспарланған. «Егемен-ақпарат»