Қытай мен Қазақстан ынтымақтастығының жай-күйі талқыланды

Қазақстанның Қытайдағы елшісі Шахрат Нұрышев ҚХР Сыртқы істер министрінің көмекшісі Ли Хуэйлаймен кездесті, деп хабарлады inform.kz Кездесу барысында тараптар екі ел арасындағы саяси, экономикалық және мәдени-гуманитарлық саладағы ынтымақтастықтың қазіргі жай-күйі мен болашағын және ең жоғары деңгейде қол жеткізілген уағдаластықтарды жүзеге асыру жолдарын талқылады. Әсіресе, биыл қыркүйек айында өтетін Қазақстан Президентінің Қытайға сапары және «G-20» саммитіне қатысуына дайындық мәселелеріне ерекше назар аударылды. «Нұрлы жол» жаңа экономикалық саясаты және Қытай бастамасы «Жібек жолы экономикалық белдеуінің» тоғысуын іс жүзінде жүзеге асыру, екі ел іске асыратын Индустрияландыру және инвестициялар бағдарламасына қатысатын кәсіпорындар үшін қолайлы жағдай туғызу және практикалық ынтымақтастықтың жаңа бағыттарын кеңейту бойынша байсалды пікір алмасу өтті. Қазақстандық дипломат еліміз аумағында бірлесіп жүзеге асырылып жатқан инфрақұрылымдық жобалардың маңыздылығына тоқталды. Мысал ретінде Астанадағы жеңіл рельс жүйесінің (LRT) құрылысын атап көрсетті. Өз кезегінде Ли Хуэйлай бірлестік аясында одан әрі тығыз ынтымақтастыққа үміттенетінін білдірді. Сондай-ақ Қытай дипломаты Еуразиялық экономикалық одақ пен Жібек жолы экономикалық белдеуін ұштастыруда Қазақстанның маңызды рөлін атап өтті. Ш. Нұрышев қытайлық дипломатқа жаһандық қауіпсіздікті қамтамасыз етуге қатысты Қазақстанның халықаралық бастамалары жөнінде баяндады, сондай-ақ оны Семей ядролық сынақ полигонының жабылғанына 25 жыл толуына орай 29 тамыз күні өтетін іс-шараға қатысуға шақырды. Айдар ӨРІСБАЕВ