Манифест қағидалары мақұлданды

Аста­на­дағы Тәу­ел­сіздік сарайында Елбасы Нұрсұлтан Назарбаевтың қаты­суы­мен өткен «Ядролық қару­сыз әлем құру» атты халықаралық конферен­цияның кеңестік дә­уірде 456 ядролық тажал сынақтардың құр­бандығы болған өз еліміз үшін ғана емес, сонымен қатар,  ядролық клубқа кіретін алпауыт елдердің сынақ алаңдары мен атом бомбасынан тікелей зардап шеккен өзге халықтар үшін де, атомсыз бейбіт әлемде өмір сүруді көксейтін өзге мемлекеттер үшін де мәні зор болды. Бұлай деуге толық негіз бар. Біріншіден, атал­­мыш кон­фе­рен­­­­­­ция Се­­мей ядро­лық сы­­­нақ алаңы­­­ның жабыл­ға­­нына ши­рек ғасыр толған ме­­рейлі сәтіне бағыш­­­талса, екіншіден, бұл ша­ра өз жеріндегі ала­пат ядролық арсеналдан өз бетімен бас тарт­қан, сондай-ақ, әлем­дегі анти­яд­ролық қоз­ғалыстың көш басында келе жатқан және атом қ­а­руынсыз-ақ қауіпсіздігін сақтап, тұ­рақты дамудың сара жолына түскен Қазақстан Республикасы егемендігінің 25 жылдығына бағышталды. Үшіншіден, бұл кон­ференцияға әлемнің 52 елінен беделді тұлғалар бастап келген делегациялардың құра­мында бейбіт атом қағидасын ұстанған 180-ге жуық адам қа­тысты. Олардың ішінде әйгілі саясаткерлермен қатар, абырой-атағы биік парламент депутат­тары, өкіметтердің жауапты қыз­меткерлері, әртүрлі халықаралық ұйымдардың өкілдері, қала мэрлері, қоғам қайраткерлері және үкіметтік емес ұйымдардың өкілдері де баршылық. Конференцияның жалпы отырысы мен төрт панельдік сессия­ларында сөз алған тұлғалардың барлығы да Қазақстан Прези­ден­тінің терең мазмұнды баянда­масы мен БҰҰ-ның ресми құжат­тарының бірі болып тіркелген  «Әлем. XXI ғасыр» атты мани­фесіне және конференция қабыл­даған «Астана көзқарасы: ядро­лық сынақтарға тыйым салудан – ядролық қарусыз әлемге» атты  үндеуге  бірауыздан қолдау көрсетті. Әділ АХМЕТОВ, Қазақстанның еңбек сіңірген қайраткері