Оңтүстікте рұқсатсыз салынған құрылыстар бұзылды

Оңтүстік Қазақстан облысында рұқсатсыз салынған құрылыстар бұзылды. Бұл туралы аймақтық коммуникациялар қызметінде өткен баспасөз мәслихатында айтылды. Жыл басынан бері 1034 нысанның құрылыс монтаж жұмыстарына бақылау жасалған. «Басқарманың құрылыс инспекторлары облыстың аудан, қалаларында салынып жатқан құрылыс нысандарына 1453 рет тексеру жұмыстарын жүргізіп, анықталған кемшіліктер бойынша 587 нұсқама берді, кемшіліктері түзетілді. Сонымен қатар, әкімшілік құқық бұзушылық жөнінде 329 хаттама толтырылып, 242 қаулымен 58,5 млн теңге әкімшілік айыппұл салынды. Ал заң талаптарын бұза отырып салынған нысандар бойынша соттың қарауына 120 нысан жіберіліп, сот шешімімен 6,4 млн теңге айыппұл салынды», деді облыстық мемлекеттік-сәулет құрылыс бақылау басқармасының басшысы Құттыбек Жамашев. Сонымен қатар, заң талаптарын сақтамай салынған 106 нысан бойынша іс сотқа жолданып, оның 32-сін бұзу жөнінде өкім шыққан, 22 нысанға айыппұл салынды. Бақтияр ТАЙЖАН