Шетел журналистері Қазақстан туралы жазды

«Қазақстан шетелдік БАҚ көзімен» байқауын ұйым­дас­тыру комитетіне келіп түскен материалдардың сапасы көңі­лі­мізден шықты. Жыл өткен сайын конкурсқа қатысуға ниет және қызығушылық таны­ту­шылардың қатары өсіп келеді. Яғни, бұл – өсу динамикасы бар деген сөз. Осындай байқаулар арқылы әлем жұртшылығы қазақ халқы, оның болмысы, ұлттық құндылықтары мен ерекшеліктері, Қазақстанның ұстанып отырған саясаты туралы тереңірек білуге мүмкіндік алады». Кеше Сыртқы істер министрлігі мен Қазақстан Бас редакторлар клубы ұйым­дастырған «Қазақстан шетелдік БАҚ көзімен» байқауының жеңімпаздарын марапаттау рәсімі кезінде еліміздің Сыртқы істер министрі Ерлан Ыдырысов осылай деді. Осымен үшінші мәрте ұйым­дастырылып отырған байқауға дүние жүзінің 30-ға жуық елінен 60-қа тарта өті­нім келіп түсіпті. Бұл жолы Иор­дания, Ресей, АҚШ, Түркия және Франция елдері журналис­терінің бағы жанып, байқау жеңім­паздары деп танылды. Мә­селен, қазылар алқасы ТМД елдерінің арасы­нан Ресей журналисі Мари­на Набат­никованың жазған ма­қала­сын үздік деп бағалапты. «Аргументы и факты» апта­лық газетінің тілшісі «Даму үшін жа­ралған. Қазақстанмен сауда-эко­номикалық қарым-қатынас қалай дамып келеді?» тақырыбы бойынша жарық көрген мақаласында ол Қазақстан мен Ресей арасындағы сауда-экономикалық және мәдени ықпалдастық мәселелерін жан-жақты талдауға тырысқан екен. Сондай-ақ, Франциядағы «HuffingtonPost.fr» онлайн-басылымында шыққан «ЭКСПО-2017: болашақ энергия қандай болады?» мақаласы үшін Паулин Гаврилов, ал АҚШ-тың «Washington Times» газетінде Қазақстанның «Болашақ» бағдарламасы туралы жарияланған материалы үшін Дуглас Бартон жеңімпаздар қатарын толықтырды. Бұл жолы Таяу Шығыс және Африка елдері үміткерлерінің арасынан иорданиялық журналист Мохаммед Газалдың «The Jordan Times» басылымында шыққан «Иордания мен Қазақстанның әлемге деген көзқарасы ортақ» тақырыбындағы мақаласы мен Азия елдері журналистерінің арасынан Түркияның белгілі журналисі Куршад Зорлудың «Yeni Cag» газетінде жарық көрген «Еуразияның кілті – Қазақстанның дамуы мен тұрақтылығында» атты жазбасы қазылардың жоғары бағасын алды. Марапаттау рәсімінің соңында Сыртқы істер министрі Ерлан Ыдырысов аталған шараны ұйымдастыруға демеушілік танытып, қолдау көрсеткендері үшін «Қазақстан Темір Жолы ҰК» акционерлік қоғамына, Қазақ­станның Ұлттық Олимпиадалық комитетіне, «Rixos President» және «Rixos Borovoe» қонақүйлеріне, «Арғымақ» көлік компаниясына, сонымен қатар, байқаудың халықаралық серіктесі саналатын «KLM Голландия Корольдігі әуежелілері» ірі әуе тасымалдаушысына алғысын білдірді.  

 Ләйла ЕДІЛҚЫЗЫ, «Егемен Қазақстан»