«Барыс» басым болды

Бұрнағы күні Құрлықтық хоккей лигасының тұрақты чемпионатында «Барыс» Нижнекамскінің «Нефтехимигімен» кездесіп, 5:4 есебімен жеңіске жетті. Бұл матчта есепті ресейліктер ашты. Ойыншы басымдығын сәтті пайдаланған нижнекамскіліктер 6-минутта Игорь Полыгаловтың арқасында алға шықты. Алайда, 16-минутта айдын иелері Мартин Сен-Пьердің көмегімен таразы басын теңестіріп кетті. Екінші кезең «Барыстың» ша­буы­лымен басталды. Кездесудің 21-минутында Ким Баркер мергендігі­мен көзге түсіп, командасын алға шығарды. Бірақ, бұл голдан кейін Эдуард Занковец шәкірттерінің қарқындары бәсең­деп қалды. Есесіне, қонақтар шабуылдарын үдетіп, 7 минутта  үш шай­ба соғып кетті. Алдымен, 29-ми­нутта Александр Китаров есепті теңестірсе, 31-минутта Джеф­фри Кинрейд командасын алға шығарды. Ал 36-минутта Ри­харда Гюнге есепті 4:2-ге жеткізді. Осыдан кейін ғана «Барыс» хоккейшілері жинақылық танытып, жүйелі ойнай бастады. Әсіресе, Ким Баркер, Найджел Доус, Брэндон Боченски үштігі қарсыластардың қақпасын ны­санаға алуды жиілетті. Сондай ұрымтал сәттердің бірін ұтымды пайдаланған Боченски 39-минутта нәтижелі соққы жасап, есеп айырмасын қысқартты. Кездесудің соңында алаң ие­лері қарқындарын одан әрі күшейте түсті. Шабуылда да сауатты қимылдаған астаналықтар ойынның 48-минутында есепті 4:4-ке жеткізді. Бұл жолы табло­ға «Барыс» сапындағы жаңа ойын­шылардың бірі Никита Иванов­тың есімі жазылды. Ал ойынның аяқталуына 4 минут қалғанда, астаналықтар бесінші шайбаларын соғып, жеңіске жетті. Голдың авторы – канадалық легионер Кори Тривино. Осы жеңістен кейін «Барыс» 7 ұпаймен Шығыс конференциясында 12-орынға жайғасты. Аста­налықтар келесі кездесулерін де өз айдындарында өткізеді. Бүгін болатын ойында «Барыс» Қазан­ның «Ак Барсымен» сынға түседі. Аталған матчтан кейін іле-шала «Нефтехимиктің» бас жат­тықтырушысы отставка­ға жіберілгені де белгілі болып отыр.