Румыниядағы біздің фестиваль

Бухарестегі дәстүрлі өнер шеруі есте қалар ерекше сәттерге толы болды. Шара ел Тәуелсіздігінің 25 жылдық мерейтойы құрметіне арналды. Мерекелік шараны Қазақстан­ның Румыниядағы елшілігі  «Интернейшнл КМГ» компаниясы демеушілігімен ұйымдастырды. Қазақ киносы фестивалін өткі­зу­ге Ш.Айманов атындағы «Қа­зақ­фильм» киностудиясы мен Бухарестегі Француз мәдениет институты атсалысты. Фестиваль аясында Сергей Снежкин, Ермек Шынарбаев, Рүстем Әбдірашев, Досхан Жолжақсынов, Ермек Тұрсынов сынды белгілі режис­сер­лердің әр жылдардағы таңдаулы 5 фильмі көрсетілді. Қазақ киносы күндерінің ашылу салтанатында Қазақстанның Ру­мыниядағы елшісі Дәулет Баты­рашев бұл фестиваль екі ел арасындағы достық қарым-қатынас пен ынтымақтастықты да­мытуға айтарлықтай үлес қоса­ты­нын айта келіп, мәдени дәстүр­лердің мұнан кейін де жарасымды екпінде жалғаса беретініне сенім білдірді.  «Шал» фильмінде басты рөлді сомдаған әртіс Ер­болат Тоғызақовқа Бухарест жұрт­шылығы сүйіспеншілікпен ыстық ілтипат танытты. Еске сала кетейік, қазақ киносының Румыниядағы алғашқы фестивалі былтыр Қазақ хандығының 550 жылдығы  құр­метіне орайластырылған болатын. Қаршыға КҮЛЕН