Ұлттық қауіпсіздік комитеті Шекара қызметіне екі айлық қатаң іріктеуден өткен әскерге шақырылушылардың алғашқы командасы Астана қаласынан Мемлекеттік шекараны күзету бойынша Жағалық күзету өңірлік басқармасы учаскесіне өздерінің әскери борыштарын өтеуге салтанатты жағдайда аттанды, деп хабарлады ҚР ҰҚК ШҚ-ның баспасөз қызметі.
Қазақстан Республикасы Президенті Жарлығының және Қазақстан Республикасы Үкіметі қаулысының негізінде көктемде және күзде жылына екі рет жүргізілетін әскери шақыру кезеңдерінің – «Күз-2016» шақыру науқанының алғашқы күні Астана қаласы бойынша Қорғаныс істері жөніндегі департаменті әскерге жаңа шақырылған 43 адам Ақтау қаласындағы ҰҚК ШҚ теңіз әскери бөлімдерінде қызмет атқаруға аттанды.
Астанадан қызмет атқаруға аттанған жастардың көпшілігі «Астана» шекаралық кораблімен шекара күзететін болады. Салтанатты шығарып салу кезінде теңіз шекарашылары арнайы киімдерімен сапқа тұрды.
ҰҚК Шекара қызметінің, Астана әкімдігінің, Қорғаныс министрлігінің және Қорғаныс істері жөніндегі департаменттің басшылығы, болашақ шекарашылардың құрдастары, ата-аналары, Шекара қызметінің және Қарулы Күштердің ардагерлері, сондай-ақ Отанымыздың теңіз шебін қорғап келген, бір жыл бұрын жас сарбаздардың қатарында болған «Астана» шекаралық кораблінің рульдік белгі берушісі матрос Шұғайып Сабырбек әскерге шақырылушыларға ақ жол тілеп, мерзімді қызмет атқаратын орындарына шығарып салды.
ҰҚК Шекара қызметі директорының орынбасары полковник Асхат Ахметов құттықтау сөз сөйлеп, бүгінгі күні жас сарбаздар өзінің әскери борышын адал және лайықты атқаратын әскерлердің қатарына қосылғанын айтты.
Мемлекеттік шекараны күзету, еліміздің Каспий теңізіндегі экономикалық мүдделерін қорғау теңіз-шекарашыларының басты міндеті болып табылады. Кез келген ауа райында олар теңізге шығады, шекара бұзғандардың соңына түседі және ұстайды.
Салтанатты іс-шарадан кейін әскерге шақырылушылар шекаралық авиациямен қызмет атқару орнына жөнелтілді. Кешегі әскерге шақырылушылар қаңтар айының соңына дейін теңіз оқу орталығының базасында оқудан өтеді, содан соң еліміздің теңіз шебін күзететін бөлімшелерге таратылатын болады.
Жаңа шақырылымды Жағалау күзеті өңірлік басқармасының қолбасшылығы қарсы алды. Оларды теңіз шекарашыларының балансында тұрған шекаралық корабльдермен, катерлермен, техникалар және қару-жарақтармен таныстырды.
Бір жылдан соң осы жастар туғандары мен жақындарының сенімді тірегі болатындай есейіп, туған өлкелеріне қайтып оралады.
